28/12/2014

En 2014

Avèm ajut de vòts en occitan, un president de drecha, Michaël Schumacher qu'es tombat en esquí,  Dieudonné que nos faguèt cagar, las femnas tunisianas valorizadas dins lor Constitucion, Kim Jong-Un (lo caluc de Corèa del Nòrd) qu'aviá ja fach fusilhar son amigueta, (benlèu) balhat son oncle als cans e que prometèt un desastre nuclear al monde, l'òrra bòria de 1000 vacas, los embestiaments judiciaris de Serge Dassault,  lo drech d'avortar menaçat en Espanha alara que la França festava los 40 ans de sa lei, la liberacion de Michaël Blanc, en preson en Indonesia dempuèi 14 ans per trafic de shit, los Ukrainians que nos an rementats qu'Euròpa èra un espaci democratic envejable, la lei sul non-cumul dels mandats per 2017, París que vegèt desfilar una poiridura antisemita, racista, omofòb, anti-republicana, violenta e fascista, Geneva 2 qu'assagèt de far discutir los òmes del president e los opausaires sirians, lo vòte, pels deputats, per la ratificacion de la Carta europenca de las lengas regionalas, Bill Watterson (Calvin e Hobbes) qu'agèt lo grand prèmi d'Angolèma, lo Senat que refusèt d'anar contra lo lobby dels OGM,  la Suissa que se barrèt del monde estrangièr per votacion populara, lo president d'Oganda que promulguèt una lei anti-gay, l'escac de Geneva 2 sus la Siria,  la liberacion de Ioulia Tymochenko en Ukraina, la disparicion de l'avion de la Malaysia airlines amb 239 personas dedins, Putine qu'afrabèt los acòrdis de l'après-guèrra-freja en fasquent tornar la Crimèa e Sebastopòl dins sa federacion russa, Robèrt Menard (FN) a Besièrs, la reeleccion de Patrick Balkany e sas caçairòlas a Levallois-Perret e de Jean-Claude Gaudin (75 ans) a Marselha, la Turquia que barrèt los malhums socials del país, l'eleccion d'una femna a París, Bouteflika (77 ans) per un 4en mandat en Algeria, la sortida dels ecologistas del governament francés, la mesa en plaça d'un SMIC en Alemanha, las balenas que ganhèron un tròç de drech de vida al Japon, los calucs de Dieu qu'embarrèron 200 dròllas al Nigèr, Le Pen lo Vièlh que diguèt, en tribuna, qu'Ebola reglariá nòstres problèmas d'immigracion, los embestiaments judiciaris d'Isabelle e Patrick Balkani, la SNCF que comandèt de trens tròp larges per mai d'una gara francesa, la montada dels partits de drecha extrèma en Euròpa, la Confederacion païsana qu'anèt desmargar la sala de molza de la boriassa de las 1000 vacas, l'afar Copé, Camille Lepage, jornalista tuada en Republica centrafricana, la refòrma territoriala,  lo Musèu Solatges a Rodés, l'abdicacion de Juan Carlos d'Espanha, la reeleccion de Bachar-lo-Maselièr en Siria,  la represa de la guèrra israelo-palestiniana, los calucs de guèrra que se'n prenguèron a un avion de linha en Ukraina, Israel que tuèt de civils dins la Banda de Gaza per se'n prene al Hamas, lo centenari de la mòrt de Jaurès, lo centenari de la Guèrra de 14,  los calucs de Dieu que decapitèron  James Foley, jornalista american de 40 ans en Siria,  l'epidèmia Ebola en Africa de l'oèst, los calucs de Dieu que decapitèron Steven Sotloff, jornalista american de 31 ans en Siria, David Haines, umanitari de 44 ans e Hervé Gourdel, torista francés en Algeria de 55 ans, l'assassinat de 43 estudiants-regents al Mexique, l'afar Thévenoud, l'Euròpa que repoteguèt contra la França sus l'afar dels nitratas dins l'agricultura, la condamnacion de Gaston Flosse, los Escosseses que manquèron de gaire lor independéncia, lo retorn de Sarkozy, la joinessa d'Hong-Kong que vòlguèt pas veire sos dreches recuolar, los calucs de Dieu que decapitèron Alan Henning, umanitari de 44 ans, lo papa Francés qu'assagèt de far bolegar las linhas sus la nocion de familha dins la Glèisa e suls notables de la Glèisa, dos Franceses prèmis Nobèl : Patrick Modiano (literatura) e Jean Tirole (economia), Kailash Satyarthi e Malala Yousafzai prèmi Nobèl de la Patz, Denis Mukwege, prèmi Sakharov, lo maselaire Bachar que faguèt pas res pels Kurdes de son país menaçats pels calucs de Dieu dins la vila de Kobane en Siria, lo vesin Erdongan lo Turc que se faguèt tanben tirar l'aurelha per daissar los Kurdes turcs anar defendre lors fraires sirians, escampilhant biais puzzle sas magras possibilitats de dintrar un jorn dins l'Euròpa, la reguitnada del pòble del Burkina Faso,  lo referendum sus l'avenidor de la Catalonhalas multinacionalas qu'escapèron al fisc gràcia al Luxembourg de Juncker (president de la Comission europenca), lo robòt Philæ de la sonda Roseta que se pausèt sus una comèta, los calucs de Dieu que decapitèron Peter Kassing, umanitari american en Siria de 26 ans, l'armada del Burkina Faso que daissèt lo poder a Kafando, la mòrt dels ostatges Luke Somers, jornalista american e Pierre Korkie, professor sud-african, al Yemen, la liberacion de Serge Lazarevic, ostatge francés al Mali, lo chaple fach per de Talibans dins una escòla del Pakistan (132 enfants mòrts sus 141 victimas), los USA e Cuba que se vòlon tornar amigadar, mai de 3500 migrants mòrts en Mediterranèa, 200 000 mòrts en Siria dempuèi 3 ans…


Son defuntats : Claudio Abbado, Pete Seeger, François Cavanna, Philip Seymour Hoffman, Paco de Lucía, Antoinette Fouque, René Teulade, Shirley Temple, Alain Resnais, Marc Blondel, Jacques Servier, Jacques Le Goff, Régine Deforges, Peter Matthiessen, Dominique Baudis, Gabriel García Márquez, Micheline Dax, Francesc Vallverdú, Léon Mercadet, Pierre Vassiliu, Pierre Bec, Hervé Cristiani, Robin Willians, Lauren Bacall, Ménie Grégoire, Antoine Duhamel, André Bergeron, Jean-Jacques Pauvert, Christophe de Margerie, Jean-Claude Duvalier, Marie Dubois, Oscar de la Renta, Manitas de Plata, Alexandre Grothendieck, Lucien Clergue, Jean-Marc Lech, la reina Fabiola dels Belges, Joe Cocker,  Jacques Chancel…

Decembre de 2014

• Vergonha a la mòrt dels ostatges Luke Somers, jornalista american e Pierre Korkie, professor sud-african, al Yemen.
• Òsca a la liberacion de Serge Lazarevic, ostatge francés al Mali.
• Vergonha al chaple fach per de Talibans dins una escòla del Pakistan (132 enfants mòrts sus 141 victimas).
• Òsca als USA e Cuba que se vòlon tornar amigadar.
• Vergonha a Ebola que contunha de far de mòrts en Africa.
• Vergonha a la mòrt qu'a pres Jean-Marc Lech, Joe Cocker e Jacques Chancel.

27/12/2014

Vilas vergonhosas

L'afar es simple : caçar los SDF de la vista dels crompaires dins un airal comercial. Aquò poiriá gastar lo plaser dels crompaires de fetge gras. Rescondre la misèria a pas jamai fach de ben a l'Umanitat.