30/09/2014

Setembre de 2014

• Vergonha als calucs de Dieu qu'an decapitat Steven Sotloff, jornalista american de 31 ans en Siria, David Haines, umanitari de 44 ans e Hervé Gourdel, torista francés en Algeria de 55 ans.
• Vergonha al personal politic que se crei al-dessús de las leis, maugrat l'afar Cahusac e dins lo mème partit.
• Òsca a l'Euròpa que repotega contra la França sus l'afar dels nitratas dins l'agricultura e vergonha als païsans franceses que tròban pas normal d'arrestar d'utilizar aquela salopariá que nos balha de cancèrs. Lo totjorn mai se deu arrestar.
• Òsca a la condamnacion de Gaston Flosse que lo sortís definitivament de la presidéncia de la Polinesia francesa e del Senat.
• Vergonha a Ebola que contunha son òrre trabalh en Africa de l'oèst.
• Òsca als Escosseses qu'an mancat de gaire d'avure lor independéncia.
• Òsca als Espanhòls qu'an recuolat sus lor projècte de lei de restriccion del drech a l'avortament per las Espanhòlas.
• Òsca a una coalicion internacionala qu'assaja d'arrestar los calucs de Dieu en Siria.
• Vergonha a la mòrt qu'a pres Antoine Duhamel, André Bergeron e Jean-Jacques Pauvert.

08/09/2014

Un còp l'estiu passat…

…e 100 000 visitaires après, anère al Musèu Soulages de Rodés. Comencèrem per anar manjar un miwam (miam !) a cò de Bras (Pierre Niney al ras, aquò gasta pas res) e pièi dintrèrem dins lo "negre" qu'es pas tant negre qu'aquò, mas aquò o sabiái ja per çò que treve pas mal del costat del musèu Fabre de Montpelhièr. Los que se trufan de l'òbra de Soulages se deurián calar : del temps que elses èran encara a se far cambiar las pelhas per lor maire, Soulages expausava ja a New-York. N'i a qu'an lo Ieu talament subredimencionat que veson pas las coniflas que son venguts. L'ombra del Ieu sovent fa de tòrt. 
Après, anèrem far quatre-oras tornar a cò de Bras per tastar un borriòl : meravilhós.
E pièi, al Musèu Soulages, i a lo trabalh de l'artista mas i a tanben lo trabalh dels arquitectes catalans. Se me voliái far bastir un ostal, fariái far una replica del Musèu Soulages, en pichon e sus un causse.

03/09/2014

Henri Alauze es partit (1927-2014)

Ne parlave aquí.  Quand a compres qu'anava passar, a escrich a sa familha : “Quand lo lauraire sentís sa fin arribar, convida lo monde qu'aima.” An manjat al restaurant lo dimenge 24 e s'es atudat dimarç 26 d'agòst. Emblidarai pas Henri.