18/06/2014

La cata a catonat

Coma soi l'urosa mestressa de la pus genta, la pus crana, la pus brava e la pus polida cata del monde, davant de la far operar, li ai daissat far de catons. Tres seradas de tira, de mascles venguèron li cantar la serenada jos la fenèstra de la cambra. Las doas prumièiras seradas, la cata estimèt mai mos gratilhons que non pas las cançons d'amor dels marros. Lo tresen ser, sortiguèt e tornèt pas dintrar de la nuèch. Me fasiá un pauc pessament per çò que los mascles qu'aviái vist rabalar empr'aquí èran pas gaire polits e un èra francament irange... Mas la cata fasquèt 4 catons dins la nuèch del 8 al 9 de junh e me pense que deviá trevar dins lo canton un Cat-Bachelor per çò que los 4 catons son polidooooons coma tot. Coma son de longa amochonats los uns suls autres, es pas aisit de los fotagrafiar. I arribarai melhor dins un quinzenat de jorns quand se penjaràn a las cortinas…

Aucun commentaire: