26/05/2014

Vergonha

Quand aviái vint ans, me pensave que las vièlhas coniflas racistas, omofòbs, los qu'èran contra tot, fasián partida del passat, d'una classa d'atge, que los gravèls los esperavan e que l'umanitat ne seriá pas contristada. Pensave que, nautres, los joves, amb tot çò qu'apreniam a l'escòla, amb la television que nos fasiá veire pus luènh, amb totes los libres que podiam legir, amb las tecnologias novèlas, los escambis novèls, l'informacion autra que la de TF1, podiam pas rasonar coma los vièlhs cons que, justament, aviam los mejans de saupre mai de causas, de trobar mai de responsas a las questions que nos pausàvem. 
Puèi, pichon a pichon, las annadas son passadas e, pichon a pichon, me soi trachada que de monde pus joves que ieu seguissián las piadas dels vièlhs cons : los mèmes discorses asiroses, la mèma ignorància, la mèma abséncia de curiositat. 
Ai vist arribar de joves dins de conselhs municipals que se presentavan pas que per elses e lor familha (de païsans mai que mai, los bèlses que demòran). Lo vilatge, la vida, se'n foton, vòlon saupre de que se vend, end van arrengar tal o tal camin, tot çò que los poiriá contentar elses e lor familha e blocar tot çò que lor servís pas a res a elses. Ai ausit de joves téner de discorses racistas alara que sèm dins un endrech end i a pas gaire d'estrangièrs. Ai ausit de monde dire que la television en preson èra una vergonha. Pensavan pas que lor filh que s'arsolhava cada dimenjada podiá tuar quauqu'un en dintrent en veitura e anar passar quauques temps en preson. Ai ausit de monde dire que comprenián pas per de que l'Educacion nacionala impausava un cors de filosofia a l'escòla. 
Es per totas aquelas rasons qu'endure de mens en mens lo discors tengut dempuèi tant d'annadas per dire que cal desencusar los electors del Front nacional. Non, los electors del Front nacional vòton Front nacional per çò que son d'acòrdi amb lo Front nacional. Deuriái dire que pensan coma pensa lo Front nacional, es a dire que pensan tot çò que lo Front nacional pòt pas (encara) dire publicament.
Levat los quauques capòrcs de mon enfància que n'èran fièrs, los prumièrs que votèron FN o fasián un pauc vergonhosament, los que pendant la segonda guèrra mondiala serián pas estats de collabòs (aquel monde s'engatja pas, ni d'un costat ni de l'autre, o alara s'arrengan per o far d'un biais anonim) mas qu'aurián daissat far. Ara, pels joves, Hitler fa partida de l'istòria coma los autres, d'una autra epòca. 
Un fum d'abstencionistas que coneisse an plan fach d'anar pas votar ièr, sabe pas que de tròp per qual aurián votat...
Aqueste matin, soi vertadièirament tocada per çò que vesèm e me pòde pas empachar d'avure una pensada prigonda pels umanistas que visquèron las annadas negras.


Aucun commentaire: