08/01/2014

De l'escòla

Soi totjorn estada contra las nòtas a l'escòla. Per ieu, aprene deu demorar un plaser. A la campanha, dins las escòlas de mai d'un nivèl, aquò's sovent entendut coma aquò. Mas ara, la Polideta es en seisena e li demandan d'aprene tot per còr. Quand me mete ambe ela pels devers, assage, coma de davant, de li far aprene sas leiçons d'un biais agradiu, de còps ludic, e aquò dintra plan. Solament, las nòtas seguisson pas per çò que la Polideta coneis pas las leiçons per còr. E non. E ieu tanpauc. Las remarcas dels professors son totjorn las meteissas : "la Polideta coneis pas las leiçons per còr." E ben non. Aquò m'encanissa e ai pas enveja far aprene a la Polideta de causas per còr. Fa que serà pas la prumièira de la classa (notatz que se'n fot, ela, çò que mai l'agrada al collègi, son sos amics), mas contunharà d'aprene de causas ambe plaser.
L'altre jorn, aviá una evaluacion d'istòria. M'agrada l'istòria, a ieu. La civilizacion grèga : Sparte, Massilia, los temples, los Dieus, Homère… Sabiá tot çò que deviá saupre, la Polideta. Quand tornèt, lo ser, me diguèt qu'aviá pas talament capitat.
“A… Per de qué ?
– Ja ai pas sachuda la prumièira question…
– De qué èra, coma question ?
– Nos demandèt la definicion d'un mot que me sovene pas pus…
– Assaja de te sovenir… Es pas la definicion de "panhellenique", e ?
– Si, es aquò : "panhellenique" !”
Òc, lo mot èra ben dins lo libre. Òc, l'avèm vist aquel mot. L'avèm legit. Mas, volguère pas,  volontàriament, demandar a la Polideta de se sovenir d'aquel mot. Anatz per la carrièira e demandatz al monde se coneisson "panhellenique". E l'autra conifla de professor d'istòria que lor demanda de ne balhar la definicion (per còr, evidentament) ! La Polideta aurà una missanta nòta mas sabe, ieu, que coneis çò que deu conéisser suls Grècs en seisena.
Urosament qu'es pas dins la competicion, la Polideta, si que non, aquò la poiriá trebolar. Ieu, aime l'istòria per çò qu'ai ajut dos professors d'istòria de prumièira : un al licèu, l'autre a la facultat de Drech. Aquí, vegère tre la debuta de l'annada qu'aquel professor d'istòria èra pas un semenaire d'envejas.

4 commentaires:

Mela a dit…

L'escòla per veire los amics e l'escòla vertadièra a l'ostal e luènh de l'escòla !

Patricia a dit…

A pres 8/20...

Mela a dit…

ò, pecairòta!

Patricia a dit…

Se'n fot... La vida es tròp polida per se mainar d'un afar coma aquel. Òc mas bon...