28/03/2013

La prima serà (enfin) aquí lo 20 d'abrial !

(Dessenh de G. Marty)

Març de 2013

• Vergonha a la mòrt qu'a pres Jérôme Savary, Olivier Metzner, André Fontaine e Jean-Marc Roberts.
• Òsca a la votacion suissa qu'a decidit de limitar las remuneracions dels patrons.
• Vergonha a l'abséncia de presa de consciéncia dos ans après Fukushima.
`• Vergonha a la guèrra en Siria que dura dempuèi 2 ans (mai de 70 000 mòrts).
• Òsca a la confirmacion de la condamnacion del coble Tibéri dins los afars dels mòrts que vòtan dins lo 5en arrondiment de París. E vergonha a Jean Tibéri qu'es totjorn en plaça.
• Vergonha a Hollande que ratificarà pas la Carta europenca de las lengas regionalas o minoritàrias alara qu'èra la 56ena de sas promessas de campanha.
• Òsca a Jérôme Cahuzac (ministre de Bercy) que demissiona per çò qu'es metut en causa dins un afar de còmpte en Suissa. Ausisses Tibéri ?
• Vergonha a Chypre que refusa la demanda d'Euròpa de taxar los còmptes bancaris dels rics (sustot los dels Russes qu'i venon enblanquir lor argent) . Es domatge, seriá estat la prumièira vertadièira mesura contra un paradís fiscal e auriá calgut o far tanben en Irlanda, al R.U., al Luxembourg, etc. Domatge, òc, domatge… Òsca a Chypre que va, fin finala, tustar suls rics qu'an metut d'argent dins lors bancas. Serà dificil pel país per çò que l'economia repausava sul sistèma bancari mas au mens, al luòc de prene als contribuents òm pren a los que noirisson los paradises fiscals.
• Òsca a la justicia que vòl saupre per de qué Bernard Tapie s'es vist balhar gaireben 400 milions d'euròs en 2007 (45 millions pel prejudici moral) per Christine Lagarde (alara ministra de l'economia, ara al FMI) dins l'afar de la venda d'Adidas (dins las mans de Tapie) pel Credit Lionés (1993).
• Òsca a l'idèa de suprimir las allocacions familialas a las familhas las pus ricas. Sèm en crisi, esperan pas après aquò per far d'enfants e, de tot biais, sèm tròp sus aquela planèta.
• Òsca a l'avançada de la situacion kurda en Turquia (mai de 40 000 mòrts dins un trentenat d'annadas).
• Vergonha a tot aquel monde, Guaino l'Arlaten-que-se-pren-per-Malraux çò prumièr, que se'n prenon al jutge Gentil per çò qu'a metut Sarkozy en examèn dins l'afar Bettencourt. Se'n deuriá venir justificar davant los Franceses, etc. Ont sèm ? Dins un Estat de drech ? Serián totes d'arnarquistas ?
• Òsca al Medef qu'a pas volgut cambiar sos estatuts per balhar pas a Parisot lo drech de se tornat presentar a la presidéncia.

27/03/2013

Despertinar defòra \°/

Totes a Rodés lo 20 d'abrial !

Las jòias de la modernitat

Ièr a ser, ère a Naucèla amb la Coordinacion occitana d'Avairon per aprestar lo Passacarrièira del 20 d'abrial a Rodés. La reunion deviá èsser dins una sala del complèx esportiu del vilatge. Arribèrem un quart d'ora en avança davant la pòrta de la sala e capitèrem pas a la dubrir amb la clau que nos avián balhada. Quauqu'un nos venguèt explicar qu'aquela pòrta aviá una sarralha electronica e que se podiá pas dubrir davant l'ora. Bon. Esperèrem un quart d'ora. A l'ora dicha, assagèrem tornarmai. La sarralha voliá pas res saupre. Benlèu que la clau èra pas estada programada per la bona ora... Nos calguèt anar far la reunion dins la sala d'espòrt.
Aquò me desespèra de veire aquela modernitat que fa cagar tot lo monde : es qu'un responsable d'associacion es pas capable de prene una clau normala, de dubrir una pòrta normala per una reunion, de tornar barrar la pòrta normala en fin de reunion e de tornar la clau normala a qual de drech après ? De tot biais, la clau electronica, la cal ben tornar tanben… E se la reunion dura mai que previst, demoram clavats dedins coma de rainalds dins la cava, lo gas en mens ? Brrrrr... Comprene pas tot.
Aquò's coma a Laissac, autre vilatge roergàs. An bastit una residéncia amb d'ostals pegats los uns contra los autres e una piscina al mièg. Perqué pas ? Mas, tot lo torn dels ostals, an montat un cledat naut coma tres òmes e, per dintrar dins la residéncia, cal un còde, amai a pè ! Fa òrre. Aviái vist aquò, fa quauquas annadas, a la television : los vièlhs de Miami fan aquò e meton un garda a la dintrada. De camps segurezats. Quante tristum ! Me pagarián, i anariái pas viure, ieu, dins aquel clastre.
Tornar, pel moment passan una pub per la domotica : los contravents de ton ostal se barran totes sols e al còp (al secors !) e pòdes agachar ton salon tota la jornada dempuèi ton telefòn portable. Vist d'aicí, aquò fa paur... o rire puslèu. Ja m'agrada d'agachar los qu'an los contravents electrics quand l'electricitat se'n va lo matin de bona ora. Demòran barrats e, quand lo lum tòrna una segonda, montan d'un centimètre. Me fa rire. Aquò fa pensar a Joan de Floreta. Lo monde devon aimar de dependre d'un fum de causas que ne son pas mèstres. Estrategia d'evitacion : ieu, mos contravents, los barre e los dubrisse quand vòle.

La lenga !

21/03/2013

Uroses los non-violents…

Lo Governament Hollande ratificarà pas la Carta europenca de las lengas regionalas o minoritàrias (èra la 56ena proposicion del candidat Hollande). Totes los amendaments qu'èran en favor de las lengas regionalas son estats regetats del projècte de lei sus la renovacion de l'escòla. Los quites jacobins dison que lo pretèxte d'un avís del Conselh d'Estat los forçava en res a renonciar a la ratificacion de la Carta. Lor podèm far fisança... Lor victòria n'es encara pus polida.
Vaquí çò qu'escriviá Maurici de Bòni del Grelh roergàs dins lo prumièr numerò de la revista Canta-Grelh en 1989 :
« En arrière-plan de notre action, on trouvera toujours la sauvegarde de notre propre identité à travers la défense de notre langue et de notre culture. C’est la seule chose qui importe vraiment pour nous.
Ainsi avons-nous plusieurs projets de lois relatifs à un statut des langues et des cultures régionales. L’une de ces propositions de loi, équilibrée, complétée, actualisée, a été déposée à l’Assemblée nationale el 8 septembre 1988 par M. Jean Briane, sous le n°266. Nous y tenons plus particulièrement pour nous être impliqués personnellement dans sa rédaction : Gilbert Mercadier, Jean Monteillet, André Combettes, Maurice Bony, conjointement avec le député de l’Aveyron.
Nous pensions qu’un ministre de l’Education comme M. Jospin, lui-même signataire d’une proposition de loi sur le même sujet, serait pour le moins ouvert à ces questions. Une fois de plus, nous nous sommes leurrés.
Réponse du Ministre à l’interpellation du député Briane sur sa politique culturelle à l’égard des langues régionales : en France les choses vont bien depuis la loi Deixonne sur ce sujet ! Pas un mot sur la résolution Kuijpers votée par le Parlement européen, le 30 octobre 1987. Pas un mot sur la Charte européenne des langues régionales adoptée par l’Assemblée parlementaire du Conseil de l’Europe, le 4 octobre 1988.
Que la France respecte l’esprit et la lettre de ces textes ! Manifestement, elle ne le fait pas.
Récemment encore, en juin, le Parlement a débattu d’une loi d’orientation scolaire. A cette occasion, quelques députés ont tenté, par le biais d’amendements, de faire reconnaître l’intérêt d’une identité et d’une culture régionales. Tous les amendements ont été rejetés.
Il s’agit bien là d’une volonté d’exclusion systématique, au mépris des engagements pris devant les électeurs comme au sein des assemblées internationales. » 
1989-2013 : 24 ans. Res a doncas pas cambiat. Qué far ? Sèm lasses. N'i a un sadol de se justificar suls avantatges del bilingüisme, sus la qualitat literària de l'òbra dels trobadors-qu'an-inventat-e-la-rima-e-l'amor-cortés… Volèm juste qu'una lenga crebe pas. 
Avèm pas res a esperar dels elegits, o vesèm ben. Avèm pas res a esperar dels nautres (çò mai dolorós). Los francimands afrancimandats se fretan las mans mas i comprenon pas res talament son afrancimandats. Lo mesprètz los confla. Se conflan e fan montar dins l'èime de los que se sentisson umiliats un sentiment anti-francés. Un matin, ausiguère Alain-Gérard Slama dire sus Cultura que la dominacion culturala èra bravament pus violenta que la dominacion economica. Creguère de somiar. Me peciguère. Parlava de las colonias, evidentament… Duèi, la jornada de la Francofonia a un gost amar. Mas "tot venceire insolent a sa pèrda trabalha" a dich La Fontaine. Veiràn ben amb l'anglés. "Te ritz pas de ton vesin que çò teun es en camin.” I serai, ieu tanben, per parar lo francés de l'anglés, i soi ja.
Dins aquela epòca ont cal de responsables en tot, qual en França poiriá èsser jutjat responsable de la mòrt d'una lenga ? La França ? Non-assisténcia a lenga en dangièr caracterizada. Aquò se plaijariá pas en defòra de França ? Sèm coma de presonièrs politics qu'esperarián lo secors de quicòm que vendriá d'endefòra nos tornar nòstres dreches e nòstra dignitat. Nos caldriá una decision supranacionala. Nos caldriá un Robert Badinter breton o occitan especialista del drech internacional.

20/03/2013

Del drech

Ièr, ausiguère Manuel Valls (lo ministre de l'Endedins) e d'autres criticar la decision de la Cor de Cassacion dins l'afar Baby Loup, una gardariá d'enfantons ont una femna èra estada licenciada per çò que portava lo vel. 
- Un : Aquò m'encanissa d'ausir de ministres (pel mens, Sarkozy èra lo mèstre per aquò) criticar las decisions de justicia. La Justicia es benlèu imperfacha mas n'avèm una e es ja pas mal e, sustot, i a la separacion dels poders. 
- Dos : Lo monde mancan de cultura judiciària. Un jorn, quauqu'un me fasquèt remarquar que los jornalistas e lo monde en general avián pas pro de cultura economica. Ne soi. Per la justicia, es la meteissa causa. Dins una autra vida, fasquère d'estudis de drech e, en drech, nos aprenon que i a tres nivèls de juridiccions en drech privat : lo tribunal que rend de jutjaments, la cor d'apèl (que tòrna començar tot lo procès a la debuta) que rend çò qu'òm apèla d'arrèsts e la Cor de Cassacion que rend tanben d'arrèsts. Mas aquela es pas facha per tornar jutjar los fachs. Jutja juste lo drech. Agacha se las règlas de drech son estadas aplicadas. Pas mai. En Cassacion, òm tòrna pas far lo procès. Es per aquò que tot lo monde pòt pas anar en Cassacion : cal que i age un problèma de drech. Aquí, la Cor de Cassacion a pas dich qu'aquela femna aviá rason de portar lo vel pendent son trabalh, a dich que, dins l'estat actual de las règlas de drech en França, res lo li podiá pas defendre. Après, aquò va tornar partir davant una autra cor d'apèl e… als avocats de cercar la falha ! Alara s'un ministre es pas content de la decision de la Cor de Cassacion a pas qu'a se'n prene a las règlas qu'existisson e que fan lo drech. Dins lo cas que nos ocupa, cossí la laïcitat poiriá recuolar alara que son aplicadas las règlas qu'existisson ?  Cal modificar lo drech.

16/03/2013

Viòl collectiu

Ja l'afar d'aquela paura Indiana violada dins un bus per 6 tipes m'aviá enrabiada. Èra amb son companhon qu'a pas pogut far res e la paura ela a pas subreviscut de tant que l'avián afrabada. Cada còp que i a un conflicte endacòm, los afars de viòls sortisson lèu. Lo viòl es tanben una arma de guèrra. "Viòl en reunion" que dison en drech. Parlas d'una reunion… Duèi, legisse qu'una torista Suissa ven de se far violar per sèt o uèch tipes, en India encara. An estacat son òme qu'èra amb ela e l'an violada. S'i meton a mai d'un, coma aquò es mai aisit. Coards ! Las femnas que viatjan solas an de pessaments a se far... Lor conselhe de crompar un dòg alemand. I a quand mème un problèma ! Los òmes an un problèma. Quantes d'afars sexuals impliquent d'òmes e quantes impliquent de femnas dins una annada dins lo monde ? E benlèu caldriá començar per agachar del costat de l'educacion que las quitas femnas balhan a lors enfants mascles... Ieu, aquelses pòrcs (perdon als gorrinons-animals), lor balhariái pas l'escasença de tornar violar quauqu'un. Lor copariái las colhas. Òm viu plan sens colhas. La pròva : n'ai pas.

15/03/2013

Aquò comença mal...

De tot biais, sas presas de posicion son las d'un Papa. Caliá pas esperar quicòm mai. E serà atal encara ben per un milièirat d'annadas : un òme, vièlh e reac. Mas per ieu, aver tant de poder sus las conciéncias e anar enebir lo preservatiu en Africa relèva mai del crimi contra l'Umanitat que de la sanctificacion.

09/03/2013

01/03/2013

De qué ?

De qu'ausisse aqueste matin ? Fan de vacas Salers sens banas geneticament ! Cossí avèm poscut autorizar aquò ? E perqué pas sens aurelhas per afortir l'aerodinamisme quand dintran dins l'estable ? Ren-ta-bi-li-tat. Cossí de païsans pòdon far o daissar far aquò ? Aquel monde me desespèra. Ère ja contristada quand vesiái de vacas desbanadas mas ara, quand sabe que pòdon nàisser sens banas, soi completament deprimida... Per quora las polas sens alas (n'an pas besonh) per las sarrar encara mai dins los clastres ?