12/04/2013

Lo passacarrièira de Rodés

Lo 20 d'abrial, la coordinacion occitana d'Avairon organiza un prumièr grand passacarrièira a Rodés. Los joves an apelat aquò “Occitan pride", jornada de la fiertat occitana.
La batèsta per l'occitan se mena sus dos fronts : contra l'administracion mas tanben contra lo pòble occitan-sens-o-saber coma disiá Bodon. Cada dos ans, los occitanistas roergasses son nombroses per anar a la manifestacion d'Anèm òc, manifestacion d'occitanistas contra l'administracion. Aquò fa son trabalh e, lo darrièr còp, los mèdias nacionals se son un pauc desrevelhats. Enfin ! Seriá plan d'anar manifestar a París un jorn. 
En Roergue avèm l'Estivada (20 ans aquesta annada !) qu'a ja fach cambiar lo vejaire del monde sus la cultura occitana. Aquí, lo 20 d'abrial, assajam quicòm mai. Sèm anats cercar de monde per ne far d'actors de la fèsta. Avèm fach 27 reunions, un pauc pertot dins lo departament, per anar discutir amb de monde que son pas d'occitanistas. Tot lo monde es pas militant dins l'arma. Pasmens, aquel monde aiman lo "patoès" coma dison e tròban domatge de lo veire s'atudar. Un me diguèt : “Atencion, ieu vene pas a una manifestacion !" O comprene. Tot lo monde es pas occitanista, amai s'o podèm regretar per de monde qu'an beguda aquela lenga amb lo lach de lor maire. Es atal. I a un fum d'autras causas bèlas que fan pas bolegar tanpauc lo monde. I se cal far. N'i a qu'aiman pas lo bruch, amai se son concernits. 
Lo grand passacarrièira se vòl èsser un dels signes de la fin de la vergonha. Sèm estats suspreses, dins las reunions, de veire la motivacion del monde per una maja fèsta occitana que ne serián los actors. N'i a mème qu'an demandat de causas qu'èran pas previstas : la messa cantada en occitan per exemple, l'idèa de cantar lo Se canta e l'Immortèla defòra, a la fin del mercat, lo bal trad a l'aperitiu del ser. Vòlon dançar, lo monde, e dançar trad.
Mai de cinquanta tèmas seràn dins lo passacarrièira, aquò fa ja de monde. E n'i a encara que s'ajustan : "E ieu, de qué pòde far lo 20 d'abrial ?” Se lo temps es amb nautres, aquò pòt èsser una capitada. 
S'aquò's una capitada, serà una capitada pel monde qu'auràn passada una bona jornada dins un ambient occitan (d'unses se pausaràn benlèu la question occitana pel prumièr còp de lor vida, çò que s'es ja passat amb de grops de joves que sèm anats rescontrar e que sabián pas tot çò que i aviá darrèr lo mot "occitan") e pels occitanistas en general, dins qunt sector que trabalhèssen. Un pauc cadun lo fais se leva. E quand se leva, se leva per tot lo monde.
Veirem ben cossí se serà passat lo 20 d'abrial a Rodés mas seriá plan d'assajar de far bolegar la societat-occitana-sens-o-saber dins cada departament occitan, tròç per tròç coma avèm fach. Segur, cal de temps e d'energia, mas aquò paga.
A la question de saupre se los autres departaments devián èsser solidaris, ai fach a Tam una responsa tirada d'un collectatge roergàs, l'istòria d'un òme qu'a pas qu'un ase per laurar e qu'estaca sa femna de l'autre costat del jog en diguent : “Arri Martin ! E tu, femna, o te fai pas dire !” O vos fasètz pas dire !

3 commentaires:

Manjacostel a dit…

manjacostel a ajouté un nouveau commentaire sur votre message "Lo passacarrièira de Rodés" :

Visca la fèsta occitana... Fin finala tomba plan aquel occitan pride , que sabem ara que la charta serà pas sinhada a mai l'ensenhament de la lenga a l'escòla , çò que pròba consi s'en chautan de la diversitat ....
Ieu i vendrai...

Patricia a dit…

Esperem que i aurà de monde. :)

manjacostel a dit…

Espèri tanben que farà solelh...