11/02/2013

De caval per de buòu

Soi ja pas luènh de manjar pas pus de carn mas aquí, quand aussisse qu'en Euròpa, òm pòt far manjar de carn de caval europenc a de monde que cresián de crompar de carn de buòu europenc, i a de que desesperar de tot. Lo problèma de la traçabilitat es una causa importanta mas i a quicòm mai : al luòc de manjar totes aquelses plats aprestats, es pas brica mai complicat de far de bonas lasanhas sens conservators, sens adjuvents de tota mena e sens carn dobtosa. Una ceba, de salça de tomata, de sal, de pebre, d'èrbas, d'alh, de carn de buòu de bona qualitat (ne cal pas gaire), de pastas per lasanhas, un pauc de salça bechamèla e de fromatge raspat. Pas complicat. S'òm ne fa pro, n'i a per dos jorns (o congelat per un jorn qu'òm a pas lo temps o l'enveja de cosinar).
Ieu, aime de mens en mens cosinar e, quand i a mai de 6 personas a taula, me cal pas venir cercar en cosina. Ai pas jamai mai de 6 personas a taula. Estrategia d'evitacion. Mai òm se coneis, mai òm a d'estrategias d'evitacion. Te'n vese que son capables de far manjar 40 personas. Ieu, me lançariái pas dins aquela aventura. Cadun son afar. Sustot qu'a la bochariá soi coma una pola davant un cotèl. Res me fa pas enveja. Mon problèma es aquel : lo plat principal. Es un problèma principal. Soi la reina de las ensaladas e de las tartas saladas. Solament, tot lo monde es pas acostumat a s'arrestar aquí dins un repais, sustot en Avairon.
Aime d'avure de monde a l'ostal mas me confla de cercar cada jorn de que far per manjar a miègjorn e lo ser e de passar de temps en cosina (estime mai passar aquel temps a caminar dins la campanha o a legir). Sabe que n'i a qu'aquò agrada. Ieu pas. Fariái un bon curat del sègle passat, amb la bona que s'ocupa de l'ostal e de la cosina. Mas coma soi pas un curat del sègle passat, qu'ai pas de bona e que cal manjar, de tot biais, assage de far de causas lèu fachas (sustot), equilibradas (lo mai possible) e bonas (aime de manjar quicòm de bon, òu !).  Vau pas anar crompar de trufas congeladas en cairats per far a la padena, plome mas trufas e las mete a la padena amb una ceba. Se i arribe, tot lo monde i pòt arribar…
Lo prèmi de l'òrra cosina, lo balhe a çò que vese dins la pub aquesta passa : lo polet a còire dins un sac de plastic al forn micro-ondas. Pòde pas comprene cossí de monde pòdon crompar una mèrda coma aquela. Es pas un manca de temps, de fenhantisa, es un manca d'estima de se, un suicidi ! Coma que, en tot cal prene de recuol.

Aucun commentaire: