29/06/2012

Ritual del miègjorn

La terrassa
Lo solelh
La calor
La balancèla
Lo cat negre estirat a l'ombra
Un cafè
e Claudi...

Es l'istòria d'un vilatge...

Es l'istòria d'un vilatge que lo president del Conselh general i viu. Es l'istòria d'un vilatge que lo fraire païsan del president del Conselh general i viu tanben. Es l'istòria de l'implantacion d'una antena Bouygues Telecom de 44 mètres de nalt (lo cloquièr ne fa 33) dins un prat del fraire del president del Conselh general (locacion interessanta, o deve precisar ?). Mas es l'istòria d'una antena que vòlon plantar aquí. 300 estatjants, gaireben 200 signaturas contra. E una manifestation ! Ieu, ère pas aquí aquel jorn mas signère la peticion. An recuolat, me sembla, mas lo projècte demòra sus la comuna.

Rodés, los cans d'Aurèle


(La Despacha)
Ai pas vist que lo de la sala de las fèstas mas aquò m'agrada fòòòòrça !

Junh de 2012




• Òsca als Egipcians qu'an pas condamnat Moubarak a la pena de mòrt mas a la preson a vida.
• Òsca al pòble rus que gausa davalar per las carrièiras contra Poutine.
• Vergonha a l'acoquinament UMP-FN. Aquesta passa, voldriái pas èsser chiraquiana.
• Òsca a la França que s'es parada d'una coabitacion.
• Òsca a Olivier Poivre-d'Arvor que ven de demissionar de la jurada del prèmi del roman arab. Lo prèmi èra estat balhat a Boualem Sansal per “Rue Darwin” mas, coma es anat al festenal internacional dels escrivans de Jerusalèm, lo li vòlon pas pus balhar.
• Òsca a Aung San Suu Kyi qu'a poscut anar quèrre son prèmi Nobèl de la Patz atribuit en... 1991 o Oslò.
• Òsca a la mòrt qu'a pres Roger Garaudy.
• Vergonha a la mòrt qu'a pres Thierry Roland, Brigitte Engerer, Nora Ephron, Robert Sabatier e Olivier Ferrand.
• Vergonha a l'UMP qu'apela a votar ni pel PS, ni pel FN quand i a pas de candidat de l'UMP al segond torn de las legislativas. An la memòria corta : 2002, Le Pen-Chirac, l'esquèrra tota votèt Chirac sens romegar.
• Vergonha al monde que contunha de se fotre de l'ecologia.
• Òsca a Obama qu'a capitat a far passar sa refòrma per balhar un bocin de securitat sociala als Americans.
• Vergonha als calucs de Dieu que s'atacan a de monuments istorics al Mali coma l'avián fach los Talibans en Afganistan.

Retorn



Ièr, retorn del trabalh. 30°. Pès nuds (aime talament aquò), lo sonrire e aquò. Los quilomètres son aital mai agradius.

27/06/2012

Mon Alibèrt

Sai pas se i a un mòt qu'ai pas cercat dins aquel diccionari... Fa 20 ans que me seg de pertot. A una istòria, aquel Alibèrt. Quand aviái un vintenat d'ans, m'agradava ja d'èsser amb los vièlhs. M'a totjorn agradat d'èsser amb los vièlhs. Cossí farai quand serai vièlha vièlha e que i aurà pas pus vièlh que ieu ? E, a 20 ans, coma ara, sovent ère pel campèstre (a l'epòca ère amb ma canha braca que li aviái aprés a culhir las amoras sus las romècs sens se fissar). Sovent, pels camins, trobave Thoum. S'apelava Pèire Bertomiu. El fasiá d'aquarelas e ieu l'agachave far. Aviá los pèlses blancs, blancs e los uèlhs blaus, blaus coma una mar clara. E un accent ! Viviá a Ièras quand èra pas en Avairon. Aviá fach un fum de causas apassionantas dins sa vida e s'èra metut a l'occitan a 80 ans. Ieu, a aquel moment, i ère pas venguda encara. Èra un intellectual. Me carrave. Moriguèt en 92 e sa filha me menèt una caissa qu'aviá daissada per ieu. Dedins : l'Alibèrt e de disques 33 torns de Patric. A la fin de 92, per un azard complet, comencère a trabalhar per la cultura occitana e me calguèt aprene a escriure la lenga secreta que me parlava mon paire. L'Alibèrt de Thoum m'esperava. Aviá ja viscut quand lo me balhèt (es anotat de sa man e aime bravament aquò) mas ara s'amerita ben la retirada dins ma bibliotèca. Se sabiá, Thoum, cossí son Alibèrt me serviguèt ! 

13/06/2012

Americanizacion

La femna del president se maina de politica publicament, e contra son òme. Ieu, a la plaça de Hollande, li t'auriái fotuda una engulada, a la Trierweiler ! E es pas per çò qu'es la femna del president, nimai per çò qu'es una femna. Amaginatz una femna de peirièr que vendriá dire a la practica de son òme que la paret qu'es a far es guèrlha, o l'òme de la cosinièira d'un restaurant que la cosina de sa femna es de racar. Cerca sa plaça, la Trierweiler ? Qunta plaça ? Es que l'òm vei M. Christine Lagarde ? Es que l'òm vei M. Angela Merkel ? Sèm pas (encara) en America. Urosament. Hollande a un trabalh bèl per cinc ans. Sa companha, òm se'n fot. A pas qu'a se téner coma se deu téner cadun. Pas mai. Es pas aquí una question de libertat d'expression o de somission feminina. Es una question de saupre-viure.
Comprene mème pas que las femnas dels presidents fagan partida dels viatges oficials. Es que los PGD de las entrepresas bèlas fan segre lor femna ? Es que pausan totes dos a la cima de l'escalièr, davant de davalar de l'avion ? Soi pas jamai estada una groupie, per ieu lo president es designat per far un trabalh pesuc. Pas res de sacrat aquí dedins. 

Born to Born

Del drech de votar... coma son òme

Doas femnas, entre los dos torns de las legislativas :
« Ieu vòte coma mon òme. Es el que me ditz per qual me cal votar.
– Ieu tanben (aquí sai pas se respondiá a la prumièira afirmacion o a la segonda).
– Mas n'i a que vòlon pas votar coma l'òme !
– A bon ? »

Pas segur...