30/12/2012

Revelhon


La sola causa qu'aime dins lo revelhon es de far una polida taula.

27/12/2012

En 2012

Avèm ajut la crisi (encara), la pèrda del triple A, Gilles Jacquièr, jornalista tombat en Siria, la fin de Saleh al Iemen, los Croatas que vòlon dintrar dins l'UE, los embestiaments del jutge Garzón en Espanha, los 60 ans d'Elisabeth II sul tròn, Sarkozy que tusta sus las lengas minoritàrias, Hans Stroh que nos ditz que los “Serments de Strasbourg” serián benlèu occitans, la China e la Russia que sostenon Bachar el Assad, Claude Guéant e sa ierarquizacion de las civilizacions, Sarkozy e sa campanha lepinizanta, Marie Colvin, jornalista americana e Rémi Ochlik, jornalista francés tombats en Siria, “Tous ay Larzac” qu'a lo cesar del melhor documentari, la capitada de "The artist”, Mohamed Merah, caluc de Dieu, a Tolosa e Montalban (7 mòrts, 3 enfantons), la manifestacion occitana de Tolosa, los 50 ans de la fin de la guèrra d'Algeria e la França qu'i es pas convidada, Poutine encara president de la Russia, mon Mac qu'a plantat, las eleccions presidencialas e Hollande president, Aung San Suu Kyi elegida al Parlament de Birmania, los ecologistas qu'an pas fach que 2 % a la presidenciala (lo FN 18 %), Michel Serres que ditz qu'emmerda los que vòlon totjorn mai d'argent, qu'el es pas ric e qu'enveja pas los rics, Joan Carlos d'Espanha que se paga de caças als elefants en Africa, la Corèa del Nòrd que nos fa susar amb sas fusadas, Obama e Hollande que se declaran pel maridatge omosexual, lo carivari del monde del Quebec contra l'augmentacion dels fraisses d'escolaritat a l'universitat, lo jutjament de Ratko Mladic, la condamnacion de Charles Taylor (Liberia) a 50 ans de preson per crimi de guèrra e crimi contra l'umanitat, l'abrogacion de la circulària Guéant sul trabalh dels estudiants estrangièrs en França, la liberacion de Roméo Langlois (Vilafrancat) retengut pels Farcs en Colombia dempuèi un mes, lo tweet de Trierweiler, los Egipcians qu'an pas condamnat Moubarak a la pena de mòrt mas a la preson a vida, lo pòble rus que gausa davalar per las carrièiras contra Poutine, l'acoquinament UMP-FN, la demission de Olivier Poivre-d'Arvor de la jurada del prèmi del roman arab, Aung San Suu Kyi qu'a poscut anar quèrre son prèmi Nobèl de la Patz atribuit en... 1991 o Oslò, l'UMP qu'apela a votar ni pel PS, ni pel FN quand i a pas de candidat de l'UMP al segond torn de las legislativas, Obama qu'a capitat a far passar sa refòrma per balhar un bocin de securitat sociala als Americans, los calucs de Dieu que s'atacan a de monuments istorics al Mali coma l'avián fach los Talibans en Afganistan, los cans d'Aurèle a Rodés, lo fetge gras defendut en California, los 70 ans del Vel d'Hiv, un caluc armat que fa 12 mòrts dins un cinema de Denver, la condamnacion a 50 ans de preson de Jorge Videla en Argentina, los jornalistas angleses qu'an trobat lo nazí Ladislaus Csizsik-Csatary a Budapest, l'argent fòl del foot, la condamnacion a perpet' de Ben Ali, la violéncia que contunha en Irak, los 9"63 d'Usain Bolt als JO de Londres, los imatges preses sus Mars, las Pussy Riot, punquetas russas condamnadas per èsser anadas cantar dins una glèisa, Lance Armstrong qu'a perdudas sas 7 victòrias al Torn de França, Israel que s'es metut dins lo cap d'atacar l'Iran, la policia d'Africa del Sud qu'a tuat 34 minaires en cauma, la fin (oficiala) de la censura dins la premsa birmana, Montebourg que vanta l'energia nucleara, la confirmacion de la condamnacion a 7 ans de preson de Ioulia Timochenko en Ukraine, l'esquèrra e los Ròms (coma la drecha), la Catalonha que vòl èsser independenta, Bernard Arnault (LVMH) que vòl prene la nacionalitat bèlga, un filmonet american anti-islam de mèrda qu'aluquèt de fuòcs un pauc pertot dins lo monde (un trentenat de mòrts) e Charlie Hebdo que trai d'òli sul fuòc en publiquent sul pic de caricaturas de Mahomet, l'assassinat de Christopher Stevens, ambassador american en Libia, la condamnacion definitiva de Total dins l'afar de l'Erika, una debuta de pròva que los OGM son missants per la santat, Aqmi que reten, dempuèi dos ans, quatre Franceses emplegats d'Areva al Niger : Daniel Larribe, Marc Feret, Thierry Dol e Pierre Legrand, lo Qatar que crompa tot çò que pòt en França, lo Nobel de la Patz per Euròpa, los Talibans qu'an tirat sus Malala Yousafzai, paskistanesa de 15 ans, engatjada dins la lucha per l'educacion de las drolletas, Felix Baumgartner qu'es tornat de l'espaci a pè, Pasqua e Santini que son tornar davant los jutges, la fin del "permés de sortir" a Cuba, François Hollande que reconeis la responsabilitat de la polícia francesa dins la repression d'octobre 1961 contra d'Algerians que manifestavan, a París, contra la preséncia francesa en Algeria, Sarkozy davant los jutges dins l'afar Bettencourt, l'arrestacion d'Aurore Martin, militanta basca, Obama qu'es encara president dels USA per 4 ans, la California que s'es prononciada per contunhar d'aplicar la pena de mòrt e qu'a refusat la mencion "amb/sens OGM" sus las denadas, Jean et Xavière Tibéri que son encara davant los jutges per avure fach votar de mòrts (París V), l'armada israeliana que jòga als terroristas dins la banda de Gaza, Mohamed Morsi, president de l'Egipte, qu'a pas metut bèl briu per se prene per un faraon, la plaça Tahrir que se tòrna emplir, l'ONU qu'a balhat a la Palestina l'estatut d'Estat observator (coma lo Vatican), Israel que, sul pic, decidís de bastir 3000 lotjaments de mai dins los territòris ocupats, las eleccions a l'UMP, lo made in France de Montebourg, Notre-Dame des Landes e son aeropòrt, Laguiòla qu'a perdut son nom, l'EPR de Flamanville que deuriá costar 2 milliards de mai, DSK que paga per acabar son istòria amb Nafissatou Diallo, Obama que menaça el Assad s'emplegava d'armas quimicas contra son pòble, 26 mòrts dins una escòla de Newtown, l'anoncia del retorn de Berlusconi, d'Estats que reconeisson l'oposicion siriana, la mesa en examèn de Jacques Servier dins l'afar del Mediator,  l'immunitat levada de Jean-Noël Guérini, senator PS de Marselha, Hollande e a Valls qu'an escrich a la justicia dins un afar de biografia non-autorizada de Valérie Trierweiler, Sarkozy que fa sa prumièira visita oficiala coma ancian-president al Qatar, Florange e lo mespres de Mittal, Depardieu que se'n va en Belgica, Nòstra-Dòna de París qu'a 850 ans, Bernard Tapie que crompa la premsa del Miègjorn, Hollande qu'a dich, davant los deputats algerians, que reconeissiá lo patiment que la colonizacion aviá fach endurar a l'Algeria, Florence Cassez encara embarrada al Mexic, l'argent rei pertot, la fin del monde qu'es pas venguda lo 21 de decembre…

An defuntat : Pierre Lefranc, Gilles Jacquier, Rosy Varte, Théo Angélopoulos, Christian Blachas, Antoni Tapies, Whitney Houston, Sophie Desmarets, Maurice André, Gérard Rinaldi, Pierre Tornade, Moebius, Michel Duchaussoy, Richard Descoings, Claude Miller, Raymond Aubrac, Ben Bella, Albert Falco, Charden, Carlos Fuentès, Donna Summer, Robin Gibb, Roger Garaudy, Thierry Roland, Brigitte Engerer, Nora Ephron, Robert Sabatier, Olivier Ferrand, Maurice Chevit, Mouss Diouf, Tsilla Chelton (Tatie Danielle), Jean-François Poncet, Oswaldo Paya, Chris Marker, Michel Polac, Patrick Ricard, Tony Scott, Jean-Luc Delarue, Neil Armstrong, Roland-Pierre Paringaux, Michael Duncan, Christian Marin, Pierre Mondy, Norodom Sihanouk, Marie-Claire Noah, Claude Pinoteau, Frank Alamo, Claude Cheysson, Sylvia Christel, Georges Chaulet, Patrick Edlinger, JR (Larry Hagman), Eric Israelevich, Oscar Niemeyer, Dave Brubeck,  Maurice Herzog, Paul Crauchet, Serge Gaugel, Pierre Destandau, Pierre Lartigue, Jean Topart

Decembre de 2012


• Òsca a Obama que menaça el Assad que poiriá avure l'idèia d'emplegar d'armas quimicas contra son pòble.
• Òsca a l'EPR de Flamanville que deuriá costar 2 milliards de mai. I a quicòm mai a far, non ?
• Vergonha a la mòrt qu'a pres Oscar Niemeyer, Dave Brubeck, Maurice Herzog, Paul CrauchetSerge Gaugel e Pierre Destandau.
• Vergonha a l'anoncia del retorn de Berlusconi.
• Òsca als Estats que reconeisson l'oposicion siriana.
• Òsca a la mesa en examèn de Jacques Servier dins l'afar del Mediator.
• Òsca a l'immunitat levada de Jean-Noël Guérini, senator PS de Marselha.
• Vergonha a Hollande e a Valls qu'an escrich a la justicia dins un afar de biografia non-autorizada de Valérie Trierweiler. E la separacion dels poders ? I a vertadièirament un problèma Trierweiler dempuèi la debuta del quinquenat.
• Vergonha a Sarkozy qu'aviá fach sa prumièira visita a l'estrangièr coma president a cò d'Onar Bongo e que ven de far sa prumièira visita oficiala coma ancian-president al Qatar. Cadun sos amics.
• Òsca a l'idèa de ligar nacionalitat e domiciliacion fiscala per forçar de ricasses coma Depardieu, qu'a fach tota sa fortuna en França, a pagar çò que deu per la solidaritat nacionala. La sola question que valga es : “Quant li demòra a la fin del mes per viure ?” A 8000 euròs a despensar per jorn. Tot aquel monde qu'an pas pus los pès sus tèrra sabon pas pus çò que vòl dire lo mot "decéncia”. Un temps vendrà qu'auràn de coachs per lor far sentir l'odor del fems o per lor far veire cossí butan las trufas. Fa pietat.
• Òsca a Nòstra-Dòna de París qu'a 850 ans.
• Vergonha a aquel caluc armat qu'es anat tuar 26 personas (20 enfantons) dins una escòla americana. Qual a de sang sus las mans ?
• Òsca a la letra de Philippe Torreton a Depardieu ("Alors Gérard, t'as les boules ?") publicada dins Libération.
• Vergonha a Bernard Tapie que crompa la premsa del Miègjorn.
• Òsca a Hollande qu'a dich, davant los deputats algerians, que reconeissiá lo patiment que la colonizacion aviá fach endurar a l'Algeria.

Maupassantariás

Aquò m'èra pas arribat dempuèi un brieu, ai lo temps. E sustot, ai lo temps de legir. Ai dins ma bibliotèca la "bibliotèca ideala de d'Ormesson" amb sa causida d'autors e, per cada autor, una causida d'òbras. Prenguère doncas lo prumièr de la tièira : Maupassant (sai pas cossí se fa qu'o legiguère pas a l'escòla).
Comencère per "Boule de suif" e ne tombère a la revèrs. Aquò se legís dins una ora e es plen d'umor (negre). Es pendent la guèrra de 70. De nòbles, de borgeses e una prostituida se tròban dins una aubèrja e ne poiràn partir pas que se l'oficièr alemand, que i es tanben, passa una nuèch amb la filha. A la debuta, tot lo monde es ofensat puèi, a mesura que lo temps passa, los autres començan de se dire que la filha i poiriá ben anar, un de mai o un de mens… Excellent. Contunhère per "La maison Tellier", l'istòria corta de prostituidas que van a la comunion de la neboda de la maire macarèla a la campanha. Plasent. Puèi me metère a legir "Une vie" e, aquí, posquère pas pus daissar lo libre. La nuèch, lo jorn, pensave pas qu'a una causa : avure un moment per contunhar de legir. Duèi, òm batejariá lo libre "Vie de merde". Una capitada totala, aquel libre. Après, legiguère "Bel ami". M'agradèt mas un pauc mens que "Une vie". Es l'istòria d'un polit enfoirat, un enfoirat de prumièira, talament enfoirat que, quand i tòrne pensar, ne soi encara espantada. Puèi, tombère "Pierre et Jean" dins dos jorns, l'istòria de dos fraires, un es fach eritièr d'un amic de la familha e l'autre pas. Plan tanben. Acabère per "Le Horla", lo raconte del començament de la foliá d'un òme. Çò qu'aime dins Maupassant es que l'istòria avança a cada pagina. 

18/12/2012

De Torreton a Depardieu, pas res a ajustar.


"Tu ne veux plus être français...? Tu quittes le navire France en pleine tempête ? Tu vends tes biens et tu pars avec ton magot dans un pays voisin aux cieux plus cléments pour les riches comme toi ? Evidemment, on cogne sur toi plus aisément que sur Bernard Arnault ou les héritiers Peugeot... C'est normal, tu es un comédien, et un comédien même riche comme toi pèse moins lourd ! Avec toi, on peut rattraper le silence gêné dont on a fait preuve pour les autres... C'est la nature de cette gauche un peu..." 
"Alors Gérard, t'as les boules ? (...) Mais Gérard, tu pensais qu'on allait approuver ? Tu t'attendais à quoi ? Une médaille ? Un césar d'honneur remis par Bercy ? Tu pensais que des pétitions de soutien de Français au RSA allaient fleurir un peu partout sur la Toile ?" 
"Le problème, Gérard, c'est que tes sorties de route vont toujours dans le même fossé : celui du 'je pense qu'à ma gueule', celui du fric, des copains dictateurs, du pet foireux et de la miction aérienne, celui des saillies ultralibérales (...) L'homme est devenu riche mais sa fortune lui a pété à la gueule. Tu sais, ces gros pets foireux dont tu te vantes et que tu lâches sur les tournages en répondant à tes 12 téléphones au lieu de bosser ?" 
"On n'abdique pas l'honneur d'être une cible [Cyrano de Bergerac] Tu t'en souviens ? Tu devrais... En ce temps-là, tu apprenais ton texte..." 
"On va se démerder sans toi pour faire de ce pays un territoire où l'on peut encore, malgré la crise, (...) faire des films et monter des spectacles grâce à des subventions obtenues en prélevant l'impôt... Un pays que tu quittes au moment où l'on a besoin de toutes les forces, en plein siège d'Arras, sous les yeux des cadets médusés... Adieu." 

Money

Escòla primària Sandy Hook, Newtown, Connecticut, 26 mòrts.

14/12/2012

DSK en America (seguida e fin)

A la sortida del tribunal, Nafissatou Diallo a mercejat lo Bon Dius (nos fan cagar amb aquò los Americans, tant coma los Arabs  que cridan "Allah akbar" quand venon de se prene una bomba sul nas). L'a mercejat d'aver crosat un jorn DSK ?

Excellent !

Tais

Ja qu'aimave pas de lo veire al cinemà,
crese pas que farà d'argent amb ieu, ara…

05/12/2012

Laguiòla


Lo brau de Laguiòla pres sul facebook del comitat de torisme d'Avairon.
Son pas pus mèstres del nom "laguiole". E per de qué prendrián pas lo nom istoric de "laguiòla" [la gleisòla] ?  Cada pèça que sortiriá de las usinas del vilatge seriá marcada "laguiòla" e lo problèma seriá reglat amb los Chineses.

03/12/2012

La vida UMPenca

18 de novembre : eleccions intèrnas per designar lo president de l'UMP.
23:30 : Jean-François Copé (drecha drecha) anoncia qu'a ganhat.
23:40 : François Fillon (drecha mens drecha) anoncia qu'a ganhat.
19 de novembre : la comission de contraròtle designa Copé venceire ambe 50,03 %. Fillon pren acte de la victòria de Copé mas denoncia la fractura morala e politica.
20 de novembre : Copé prepausa la vice-presidéncia a Fillon que refusa.
21 de novembre : La còla Fillon se tracha que la comission de contraròtle a oblidat de comptabilizar 3 federacions. Fillon ditz qu'aquò's el qu'a ganhat.
22 de novembre : Copé sasís la comission dels recors de l'UMP e denoncia la fraudariá de la còla Fillon.
25 de novembre : Alain Juppé assaja de lor far entendre rason. Escac de la mediacion Juppé. Fillon vòl plaijar. Una peticion es lançada per demandar de tornar votar.
26 de novembre : La comission dels recors declara Copé venceire. Fillon vòl pas res saupre.
27 de novembre : Fillon monta un grop novèl de deputats : lo RUMP. D'elegits UMP vòlon un referendum per demandar als aderents UMP se vòlon tornar votar (!). 
28 de novembre : Copé refusa lo referendum. Fillon fa publicar son grop parlamentari al JO e demanda de tornar votar. 
1èr de decembre : Sarkozy demanda a Copé e Fillon de sortir de la crisi davant lo 4 de decembre si que non seràn totes dos desqualificats per la presidéncia de l'UMP.
2 de decembre : Copé seriá d'acòrdi per tornar votar mas pas davant las municipalas de 2014. Fillon refusa. 
3 de decembre : Rescontra Copé-Fillon al Palais Bourbon. Sabèm pas çò que s'es dich.
L'esquèrra acusa Sarkozy de metre son nas dins d'afars politics alara qu'es al Conselh constitucional.
4 de decembre : Rescontra Copé-Fillon. Sabèm pas çò que s'es dich.
5 de decembre : Rescontra reportada al 6.
6 de decembre : Res ne sortís. Se tornaràn veire lo 10.
10 de decembre : Res. Stéphane Guillon prepausa de far votar los militants UMP sus son twitter.
11 de decembre : Bernard Accoyer va demandar, dimarç 18 de decembre, als senators, deputats e deputats europencs UMP de votar per saupre se vòlon tornar far votar. Fillon es d'acòrdi. Copé es contra.
13 de decembre : Fillon e Copé anoncian que trobaràn una solucion davant dimarç 18 de decembre. Paternotte, lo president de la comission nacionala dels recors de l'UMP es condamnat per la justicia dins un afar d'eretatge dobtós.
17 de decembre : Fillon e Copé serián tombats d'acòrdi sus un vòte en setembre de 2013. Encara una primària en 2013. Encara una guèrra frairala ?
18 de decembre : Fin finala, los parlementaris votaràn pas.
["Daissem los autres coma son, qu'ambe çò nòstre n'avèm pro.” Òc mas, aquí, son fòrts !]

— Et là, il me dit : "Un jour vos militants éliront démocratiquement le président de l'UMP..."
— Arrête... T'es vraiment trop con !



28/11/2012

Novembre de 2012

• Òsca a Obama qu'es encara president dels USA per 4 ans.
• Vergonha a la California que s'es prononciada per contunhar d'aplicar la pena de mòrt e qu'a refusat la mencion "amb/sens OGM" sus las denadas. Monsanto a (encara) ganhat.
• Vergonha a aquel país (USA) ont òm deu encara, en 2012, demissionar de son trabalh per un afar d'adultari.
• Òsca a Jean et Xavière Tibéri que son encara davant los jutges per avure fach votar de mòrts (París V).
• Vergonha a l'armada israeliana que jòga als terroristas dins la banda de Gaza e vergonha a Netanyahu qu'escriurà pas la pagina la mai polida de l'istòria d'Israel.
• Vergonha a la mòrt qu'a pres Patrick Edlinger, JR (Larry Hagman) e Eric Israelevich.
• Vergonha als militants UMP que semblan èsser majoritarament per una drecha dura. E vergonha a mon deputat que n'es.
• Vergonha a Mohamed Morsi, president de l'Egipte, qu'a pas metut bèl briu per se prene per un faraon. E òsca a la plaça Tahrir que se tòrna emplir.
• Òsca a l'ONU qu'a balhat a la Palestina l'estatut d'Estat observator (coma lo Vatican). Es pas encara Estat membre mas òm avança. Òsca a la França qu'a votat òc. E vergonha a Israel que, sul pic, decidís de bastir 3000 lotjaments de mai dins los territòris ocupats.
• Vergonha a el Assad que contunha de tuar son pòble.

Tornar mai

07/11/2012

Totsants en Sardenha

Vene de passar una setmana en Sardenha. Me soi carrada d'assajar de parlar italian. L'aime aquela lenga. L'ostal èra penjat sus la mar e, en fàcia : la Còrsa.


Quauquas remarcas :
- lo Sarde aima de discutir amb tu ;
- las fedas sardas an lo pèl long ;
- son pas fòrts pels panèus : te demòra 20 quilomètres a far e, 100 m. après n'i a pas pus que 5 o alara encara 43 (quand i a de panèus...) ;
- tot es pus car qu'a l'ostal ;
- aurián degut pausar quauquas bombetas : l'urbanizacion es, de còps, pas tròp urosa ;
- la Còsta Smeralda es un paradís ;
- las vacas sardas son magras e nautas sus patas ;
- te fan de chòcòlats cauds que lo culhièr ten tot sol dins la taça ;
- lo "ciao" es tanben un "bonjorn" ;
- son totes "Fiat" ;
- lo ròcafòrt es a 36 € lo quilò ;
- i a una carrièira Cesare Battisti a Sassari ;
- Picasso seriá pas anat en Sardenha ?
- d'un pauc mai tornave sens cap de sovenir a l'ostal talament capitave pas a trobar quicòm de polit ;
- manjan d'ases e de cavals ;
- i a de nuraghi e de tòrres aragonesas de pertot ;
- las companhiás aerianas d'Alghero sabon pas ont es Clarmont-Ferrand (o assajan de lo sarrar de París, pas con...) ;
- las femnas son jocadas sus de talons de 10 cm ;
- anoncian las defuntadas sus las parets ;
- res se passa pas entre una ora e cinc oras de l'après-miègjorn : fan plangièira. Se sortisses dins aquela passa, i a pas que los toristas que son defòra ;
- quand la polizia t'arresta, fan cort, que se vòlon pas emmerdar a explicar las causas a d'estrangièrs : “Ciao !" ;
- alai, lo caotchoc del salon de la memina es un aure ;
- òm a France Inter, France 2, France 5 e France 3 Corse (ieu, aquò m'encanissariá, s'ère Còrsa, d'ausir aquel presentator del jornal còrse (en francés) sens cap d'accent) ;
- es gaireben totjorn limitat a 50 e i a de linhas blancas de pertot mas degús respecta pas res, levat los toristas, las doas prumièiras oras ;
- fan de fromatges que semblan de botarigas de pòrc ;
- comprene pas res al sarde (ausit a Orgosolo).

Alghero (a una ora d'avion de Girona, 5 oras d'Alghero a mon lièch) es lo Saint-Malo de la Sardenha. La vila a conservada la lenga catalana (la Sardenha a sovent cambiat de proprierari). Las carrièiras an lor nom dins las doas lengas (catalan / italian). Lo sarde, crese pas de l'avure vist escrich.
(Dedicacion especiala a Mela dins la compausicion)


Orgosolo es un vilatge (amb de brigands, dins lo temps, veire lo film de Vittorio de Seta e, encara ara, de femnas vestidas de negre de pès en cap que van a la messa) ont un fum d'ostals an de frescas sus las parets (un bon conselh de mon mètge, amai se lo camin que i mena es pas aisit). Sus una paret : la lucha del Larzac amb la cardabèla. Me sentissiái coma a l'ostal ! N'i a tanben una facha per l'escolans de Mende.

Of !

24/10/2012

Amor

"Amour" de Michael Haneke, palma d'òr a Canas, amb Jean-Louis Trintignant, Emmanuelle Riva, Isabelle Huppert e aquela musica de Franz Schubert.

Un còp èra

Il était un grand nombre de fois
Un homme qui aimait une femme
Il était un grand nombre de fois
Une femme qui aimait un homme
Il était un grand nombre de fois
Une femme et un homme
Qui n'aimaient pas celui et
celle qui les aimaient

Il était une fois
Une seule fois peut-être
Une femme et un homme
qui s'aimaient


Extrait de
Destinée arbitraire
(Les nuits blanches)

Poèma dich per Jean-Louis Trintignant
(e mon còr fa bom-bom cada còp qu'ausisse sa votz)
sus Inter fa 20 segondas.

Octobre de 2012

• Vergonha a la mòrt qu'a pres Marie-Claire Noah, Claude Pinoteau, Frank Alamo, Claude Cheysson, 
Sylvia Christel Georges Chaulet.
• Vergonha als Talibans qu'an tirat sus Malala Yousafzai, paskistanesa de 15 ans, engatjada dins la lucha per l'educacion de las drolletas e òsca als Angleses que l'an presa a Birmingham per la sonhar.
• Òsca a Felix Baumgartner qu'es tornat de l'espaci a pè.
• Òsca a Pasqua e Santini que son tornar davant los jutges.
• Òsca a la fin del "permés de sortir" a Cuba. Èra ora...
• Òsca a François Hollande que reconeis la responsabilitat de la polícia francesa dins la repression d'octobre 1961 contra d'Algerians que manifestavan, a París, contra la preséncia francesa en Algeria. E vergonha a la drecha que repotega. La resisténcia seriá bona pas que pels Franceses contra los Alemands ?
• Òsca a la casuda de Lance Armstrong mas ara caldriá far tombar los autres, lo sistèma, los que l'an cobèrt, los que l'an adujat e totes los autres maganhaires. E vergonha a los que dison qu'Armstrong es un eròi per çò que s'es tirat d'un cancèr. A d'astre e d'argent, pas mai.

19/10/2012

Silenci

Dimècres, anère a l'enterrament d'un jove de 29 ans. La musica del moment que la Glèisa fa de racket de l'ofranda èra la de "La liste de Schindler". Formidabla causida, amai s'aquò fa plorar encara mai. De tot biais, dins aquelses moments, òm a pas enveja d'ausir de hard rock.
Coma la fabrica a sai que pas ganhat pro argent a la quina per crompar una sonò, demorèrem defòra mai d'una ora e mièja sens ausir res. En silenci. Es impressionnant, 300 personas drechas, bèlcòp de joves, defòra, en silenci. Soi dins un endrech qu'encara lo monde respectan, demòran silencioses, mas i a d'endreches qu'es la fièira, defòra. Quand los laïcs se desrevelharàn e qu'organizaràn de gentas ceremonias d'enterrament, la Glèisa se poirà far de pessaments.

Dins lo cors d'istòria

Norodom Sihanouk (Cambòdge) es mòrt lo 15 d'octobre e ieu cresiái qu'èra defuntat dempuèi bèl briu. Cal dire que, quand ère a l'escòla, òm me parlava ja d'el en cors d'istòria. 

30/09/2012

Setembre de 2012


• Vergonha a Bernard Arnault (LVMH) que vòl prene la nacionalitat bèlga. A paur de qué ? De morir ? Morirà de tot biais. De pas avure pro per manjar cada jorn ? Paure el... Que seriá LVMH sens l'imatge "França" e son istòria en matèria de qualitat ? Se deuriá amagar de vergonha. Li cal tornar parlar de sa condicion umana. Es just un òme. Pas mai, pas mens. E segurament pas pus urós que d'autres plan mens rics. Amagine son enterrament : caissa en òr, camions de carreg d'argent en cortègi, molons de flors per crebar. Non, l'enveje pas, aquel tipe.
• Vergonha a la mòrt qu'a pres Michael Duncan, Christian Marin e Pierre Mondy.
• Vergonha a aquel filmonet american anti-islam de mèrda qu'aluquèt de fuòcs un pauc pertot dins lo monde (un trentenat de mòrts). La conariá dels dos costats. E vergonha a Charlie Hebdo que trai d'òli sul fuòc en publicar sul pic de caricaturas de Mahomet. Lor subrebona una auriá sufit (Intouchables 2 amb un josieu e un musulman). Quanta mèrda aquò te fot la religion dins lo monde !
• Vergonha a l'assassinat de Christopher Stevens, ambassador american en Libia.
• Òsca a la condamnacion definitiva de Total dins l'afar de l'Erika. Istoric. Lo crimi ecologic es reconegut. Ara, atencion als altres !
• Òsca als cercaires qu'an avuda una debuta de pròva que los OGM èran missants per la santat. Òsca als dalhaires ! Se caldrà sovenir que los avèm metuts en preson...
• Vergonha a Aqmi que reten, dempuèi dos ans, quatre Franceses emplegats d'Areva al Niger : Daniel Larribe, Marc Feret, Thierry Dol e Pierre Legrand.
• Vergonha a Bachar el Assad que contunha de tuar son pòble.

26/09/2012

La una (geniala) auriá sufit

La vida coma l'aime pas


Çò que lor cal, a Monsanto, es lo tribunal penal internacional per crimi contra l'umanitat. Amaginatz que vendon als païsans de gran que se pòt pas tornar semenar : lo contrari de çò que se fa dempuèi lo neolitic... E parle mème pas de la santat... I a quicòm que m'estona : cossí la contra s'es pas encara organizada ? L'escandal de la vaca caborda a ja quauquas lunas. Es que lo capitalisme caluc se pòt pas contrar ? Demòra pas pus que la solucion de l'ermitatge ?

12/09/2012

Catalonha


Ai pas pro legit los arguments dels uns e dels autres per me far una idèa precisa. Sabe que d'Occitans i son anats. Ai compres que demandan l'independéncia e que dison voler èsser un estat de mai en Euròpa. Mas çò que me ven al cap sul pic es : quanta Euròpa volèm ? Una Euròpa solidària economicament ? Los Catalans demandan l'independéncia cap a Espanha per èsser dins una Euròpa solidària economicament ? I a quicòm que truca. Belgica del nòrd / Belgica del sud, Alemanha / Grèça, Catalonha / Espanha. Lo problèma me sembla èsser lo meteis. Me caldrà espepissar aquò e cercar las responsas.
Autra question : es qu'aquela manifestacion va pas balhar de gran per mòlre als nòstres amics jacobins* ? "Vesètz, ara qu'an lor lenga reconeguda, demandan l'independéncia ?" Los vese ja venir...
*Los jacobins mas tanben los que defendon la lenga e la cultura occitanas per de rasons intellectualas, sens cap d'idèas politicas, autonomistas o independentistas.

11/09/2012

USA

Perpinhan

Confitura


Per far de confitura de mirabèla cal :
- un collèga per vos balhar 4 quilòs de mirabèlas ;
- 3 quilòs de sucre ;
- de vanilha ;
- de citron ;
- La Setmana.

30/08/2012

Drecha e esquèrra : defòra los Ròms !

Ieu, aime quand los òmes s'amusan

Agòst de 2012


• Vergonha a la mòrt qu'a pres Michel Polac, Patrick Ricard, Tony Scott, Jean-Luc Delarue, Neil Armstrong e Roland-Pierre Paringaux.
• Vergonha a el Assad qu'es totjorn al poder.
• Vergonha a la condamnacion a dos ans de preson de las punquetas russas qu'èran anadas cantar dins una glèisa.
• Vergonha a Israel que s'es metut dins lo cap d'atacar l'Iran.
• Vergonha a la policia d'Africa del Sud qu'a tuat 34 minaires en cauma.
• Òsca a la fin (oficiala) de la censura dins la premsa birmana. Es ja aquò...
• Vergonha a Montebourg que vanta l'energia nucleara.
• Vergonha a la confirmacion de la condamnacion a 7 ans de preson de Ioulia Timochenko en Ukraine. Es embarrada dempuèi un an.

29/08/2012

Siria (serà pas lèu acabat ?)

Bachar aima de pausar amb los jornalistas del monde entièr.
Cartoons. Courrier international.