28/04/2011

Abrial de 2011

• Vergonha a la mòrt qu'a pres Calvin Russell, Sidney Lumet, Bernard Gaschard, Marie-France Pisier e Gonzalo Rojas.
• Òsca a la capitada de las manifestacions contra l'extraccion del gas de sistre en França.
• Òsca als pòbles del Iemen e de Siria que contunhan de luchar contra los dictators que los governan e òsca al pòble libian qu'assaja encara de far tombar l'òrre Kadhafi.
• Òsca a la fin de la situacion ubuesca en Còsta d'Evòri.
• Vergonha a Gueant, ministre de l'Endedins-que-se-sentís-pas-pus-dempuèi-qu'es-ministre, que vòl demesir l'immigracion legala alara que n'avèm economicament besonh.
• Vergonha a Bachar el Assad que fa tirar sus son pòble e òsca als 230 membres del partit Baas sirian qu'an demissionat.
• Vergonha a aquelses Palestinians falords qu'a tuat Vittorio Arrigoni, militant italian que defendiá la causa palestiniana.
• Òsca als 17 intellectuals israelians qu'an lançada una peticion per la creacion d'un Estat palestinian (sus las frontièiras de davant la guèrra dels 6 jorns de 1967) e per demandar la fin de l'ocupacion israeliana dins los "territòris ocupats".
• Vergonha als pro-nuclearis que contunhan lor catechirme alara que lo problèma Tchernobyl es pas encara reglat, 25 ans après.
• Vergonha a la reconeissença per l'Unesco de la corrida coma patrimòni immaterial de França.

19/04/2011

Ai trobat !


Aquela musica es la musica d'un film qu'es sus Canal aquesta passa e fa de jorns que me demande ont l'ai ausida (es una cançon de Marie Laforêt). Aquí, vene de trobar : dins "8 femmes" !

06/04/2011

Còsta d'Evòri e Libia

(Herrmann)

De mots

Amai sus la pus polida cadièira del monde, òm es pas assetat que sus son cuol.
Que va al lièch sens sopar, se leva sens sonar.
Lo que ganha fa l'Istòria.
E se, al luòc de montar de parets, òm bastissiá de ponts ?
Mas l'Ifèrn a qu'un temps, la vida tòrna començar un jorn.
Se ieu sabiái un pauc d'ortografia, ieu te mandariái mon còr dins un papièr.
L'eternitat, aquò's long, sustot a la fin.
Ai una set que la vese córrer.
L'istòria es pas de sègre, ai barrat lo libre.
I a pas cap d'amor, i a pas que de pròbas d'amor.
Lo savi ditz : Benlèu…
Lo qu'a de sàlvia dins son jardin a pas besonh de medecin.
Soi a viure dins lo país de la lenga secreta.
I a mai desconegut que lo soldat : la siá femna.
Se l'ase aviái causit, seriá pas nascut ase.
Aprene balha la libertat.
Viure simplament per que los altres pòscan simplament viure.
Cal téner una resolucion per çò qu'es bona e non pas per çò que l'avèm presa.
Se se pòt pas rire al Paradís, i vòle pas anar.
Sègre los panèus : altras direccions.

02/04/2011

Sègre los panèus...

Març de 2011

• Vergonha a ieu que soi talament marcada per çò que se passa al Japon que ne soi muda. Ère ja pas pel nucleari. L'òme apresta sa mòrt dapasseton.
• Vergonha als socialistas qu'acusan los ecologistas de far de recuperacion quand vòlon dubrir la discutida talament demandada e esperada sul nucleari.
• Vergonha a Nathalie Kosciusko-Morizet, ministra de l'ecologia (sic), e Eric Besson (encara el), ministre de l'industria (o puslèu del lobby nucleari-AREVA), que defendon lo nucleari e que minimisan la catastròfa joponesa. Òm diriá MAM...
• Vergonha a Anne Lauvergeon (AREVA) que nos ditz que, naltres, en França, sèm melhors que los altres. Cal arrestar de prene los Franceses per d'ases.
• Vergonha a la comunaltat internacionala qu'a pas sachut adujar lo paure pòble libian contra lo fuòc de Kadhafi.
• Vergonha a la deputada UMP que ditz, coma Le Pen, que cal tornar metre los migrants d'Africa del nòrd dins de batèus.
• Vergonha al repòrt del plaijadís contra Chirac pels emplecs fictius de la comuna de París.
• Vergonha a l'UMP que nos tòrna far cagar amb l'islam, la laïcitat e tot çò que fa montar lo FN.
• Òsca a l'ONU qu'es, fin finala, intervenguda en Libia.
• Òsca al pòble de Siria e a lo del Iemen que se daissan pas far tanpauc.
• Vergonha a Subre-Sarkozy qu'es anat fintar al Japon e qu'a, en mai d'aquò, lo missant gost d'i prene Anne Lauvergeon, patrona d'AREVA. Es coma far present d'un film pornò a qualqu'un que ven de se far violar.
• Vergonha a la mòrt qu'a pres Mèstre Capello e Liz Taylor (7 maridatges e un entarrament).
• Vergonha a Laurent Gbagbo (Còsta d'Evòri) que contunha de far son missant perdent.