05/12/2011

Aviái dich que non...

Coma ai un fum de trabalh universitari aquesta annada (soi marcada dins doas universitats, soi marcada a 35 oras de trabalh setmanièr, soi marcada als devers dels enfants, a la bugada, a la balaja, a la cosina…), aviái dich que prendriái pas res a far a costat : pas cap de cors a balhar, pas cap de conferéncia a presentar, servici minimum dins lo mitan associatiu. Res. Res. Res.
Mas. Mas. Mas. Mas, en Avairon, avèm una associacion (Lo Grelh roergàs) qu'es estada montada per Enric Molin en 1921, qu'es tanben un pichon ostal d'edicion e que publica una revista trimestrala (Canta-Grelh). Aime fòrça Enric Molin, son trabalh mas tanben son vejaire, son èime, tot, e aviái totjorn dich que daissariái pas lo Grelh roergàs s'avalir. O susvelhave d'un pauc luènh mas susvelhave. Tot anava puslèu melhor dempuèi quauques temps. S'èran trobat un capiscòl jove e dinamic : Lugan Bedèl. Lo Grelh èra a prene un vam novèl. N'ère urosa. Solament, Lugan e son amiga Anna se tuèron aqueste estiu sus una rota de Catalonha. Davant de morir, Lugan m'aviá demandat de dintrar al conselh d'administracion del Grelh e li aviái dich que òc. I dintrère doncas e calguèt trobar un autre menaire. Un dels ancians, malurós de veire que lo Grelh èra tornar dins una missanta passa, prenguèt aquela carga. Per malastre encara, lo que fargava la revista dempuèi d'annadas e d'annadas tombèt malaute. Impossible per el de contunhar d'assegurar aquel trabalh. Me vaquí doncas a manejar e a fargar Canta-Grelh. Vese pas qu'una solucion : arrestar de dormir.

10 commentaires:

lo monta-mametas a dit…

E ben! Promocion de las bèlas e escomesa de las grandas: rajovenir lo Canta-Grelh en li servant son èime... e mai se ne deves pèrdre lo beure, lo manjar, lo dormir, lo viure qué! Se'n fotèm, la revista primièra.
Me'n vau renovelar mon abonament per 2012 d'ausida.

Patricia a dit…

Que dire de mai ? Me mete al trabalh...
Sabiái pas qu'ères abonat. Se'n va luènh lo Canta-Grelh !
E justament, me disiái que ton bilhet sus l'examen fariá rire los legeires de Canta-Grelh...
T'abrace :)

lo monta-mametas a dit…

Qué creses, sèm a ma conoissença quauqu'unes dins lo ròdol clapassièr a prene plaser a ausir cantar lo grelh de Roergue.
Pel colesteròl, quand vesi totas aquelas carnsaladariás e formatges que passan l'Escaleta o que davalan de Lacauna cap al país bas, me pensi que dins ton país ne'n cal pas parlar. Seriá secutar lo mond. De tot biais podetz pas res cambiar, sètz tombats dedins quand èretz traces!

Patricia a dit…

Vertat que s'i trobaràn, los legeires. :) Prene aquò per un òc ?

lo monta-mametas a dit…

Se vòs, amb grand gaug, mas as benlèu mai preissat de far per la debuta, non?

Patricia a dit…

Ai liurat lo de decembre ièr a ser. Serà per lo de març. :)

manjacostel a dit…

Alara nos cal dire las entre-senhas per s'abonar...
mercés plan e coratge

lo monta-mametas a dit…

Veirem a la prima se t'encapriças...

Patricia a dit…

@Alan : Canta-Grelh a cò de Jean-Yves Fourrier. La Rivière du Piboul. 12120 Sainte-Juliette sur Viaur.
Es 20 € per an.
@l monta-mametas : veiràs !

manjacostel a dit…

mercés plan....