24/06/2011

Jean (Privat) Rouquette (1922-2011)

A mon amic,
mon car amic Privat.
Aviá gaireben 50 ans de mai que ieu. Èra mon amic, ère son amiga. Jamai ai pas conescut qualqu'un qu'aime tant lo monde, jamai ai pas conescut qualqu'un de positiu coma el. Totjorn èra content de çò que reussissián los altres, èra pas envejós. Se'n rejoissiá. Aviá totjorn d'idèias. Passava pas una setmana sens me venir veire. Quand arribava, disiá : "E ben la ven veire !" (Parlava a la tresena persona) Li respondiái : "E ben a plan rason de la venir veire que sens aquò se languiriá." Totas las personas que son passadas a l'ostal meun an vist Privat. Segur.
Parlava la lenga de sos ancians. L'a pas jamai renegada, el, al contrari. A escrich en occitan.
S'apelava Joan mas aviá pres per pichon nom lo nom de familha Privat per mercejar un oncle seun qu'aviá pas d'enfants e que li aviá balhat son ostal. Atal lo nom de Privat contunhèt d'èsser viu, un pauc… I ère tant acostumada que m'estonave totjorn quand òm me demandava se Privat èra ben son pichon nom.
Sa pòrta èra totjorn dubèrta e aviá una femna sus mesura per aquò. Coma ditz, ela, Marineta : "Aqueste còp nos a escapat..." A totjorn partejat son òme, Marineta.
Ai poscut li dire al reveire quand èra encara conscient, m'a sarrada la man, fòrt. Lo tornère veire 6 oras davant sa mòrt mas aquí, el, me vegèt pas. S'es atudat dins la nuèch del 22 al 23. Me mancarà.

2 commentaires:

Mela a dit…

:(((
"Totas las personas que son passadas a l'ostal meun an vist Privat. Segur. " Òc, o confirmi.

Pensi a tu.

Patricia a dit…

Sabes qu'èra estat content de crosar una professora d'occitan de ton nivèl !