29/04/2010

Fa totjorn de ben

Retorn al país

La França va tornar a la Novèla Zelanda los caps de Maoris qu'a dins sos musèus (entre quinze e vint caps). Lo Senat a ja presa la decision l'an passat e l'Amassada nacionala o deuriá far lo 4 de mai. Òsca. Ieu, te tornariái ben a l'Egipte l'obelisque de la Concorda (menat a París dins las annadas 1830), mès caldrà far de camin encara (e aquí la lei bioetica se poirà pas plaijar)… Los dos obelisques de Lucsòr èran estats balhats al còp coma present a la França mès pas qu'un fasquèt lo viatge. Lo segond demorèt en plaça e F. Mitterrand lo tornèt oficialament a l'Egipte en 1981.

27/04/2010

Abrial de 2010

• Òsca a l'idèia de bastir de presons "dubèrtas" en França, coma la de Casabianca en Còrsa.
• Vergonha a los que dison que los afars de pedofilia dins la Glèisa son pas causats pel celibat dels curats.
• Òsca a Obama e Medvedev qu'an signat, a Praga, un tractat per baissar lor armament nuclear.
• Vergonha a Sarkozy que vòl suprimir las allocacions familialas del monde qu'an d'enfants que fan los colhons.
• Òsca a la condamnacion a 25 ans de preson de Reynaldo Bignone (82 ans), dictator argentin dins las annadas 1980.
• Òsca a la Turquia qu'a permetuda una manifestacion per la commemoracion del genocidi armenian (1915-1916, mai d'un milion de mòrts). Lor manca pas qu'a reconéisser oficialament qu'es ben estat un genocidi vertadièr... O caldrà ben, se vòlon dintrar dins Euròpa.
• Òsca a las manifestacions de sosten al jutge Garzon un pauc pertot en Espanha. Una lei de 1977 (dos ans après la mòrt de Francò) defend de far d'enquestas suls crimis de la guèrra civila e la dictatura franquista e lo jutge Garzon es acusat pel tribunal suprèm d'enquestar volontarament sus aquel periòde. Un òme coratjós, aquel jutge Garzon.
• Òsca a Eva Joly que ditz que Charles Pasqua deuriá pas pus èsser senator de la Republica francesa. Lo 8 d'abrial, la Cor de cassacion l'a definitivament condamnat a 18 meses de preson amb subre-sèit. Rabala encara davant lo tribunal du justicia de la Republica (3 jutges e 12 parlamentaris) aquesta passa. Ne cal mai per lo far davalar, òm diriá...
• Vergonha a l'eleccion, tornar mai, d'Omar el-Béchir al Sodan, alara qu'a un mandat d'arrèst internacional al cuol (Darfor).
• Òsca a la liberacion de Taoufik Ben Brick, jornalista qu'èra embarrat dempièi sièis meses en Tunisia.
• Òsca a la "Laïcité Pride" organizada a Beyrouth per demandar la laïcitat, lo maridatge civil e un Estat de drech.

Bessonada

En Polonha, lo besson del president mòrt lo 10 d'abrial
se presenta a las eleccions.
[in Courrier international]

Siné hebdo, aquò's acabat

25/04/2010

Roberto Saviano

Silvio Berlusconi se'n pren ara a Roberto Saviano, aquel òme jove (es nascut en 1979) e coratjós que gausèt escriure un libre-enquesta sus la mafià italiana (Gomorra, dans l'empire de la camorra, 5 milions de libres venduts) e que, dempuèi, deu viure rescondut per acabar pas estendut sus un trepador. Berlusconi l'acusa de far de publicitat als gangs... Tornarai pas dire çò que pense qu'aquela persona e de tot çò que representa a mos uèlhs. Naltres, n'avèm un qu'es pas mal mès aquel es un rei ! Benlèu que se lo nòstre demorava tant de temps al poder fariá encara melhor ? Quante malastre…
N'i a un moment que voliái parlar de Roberto Saviano e de sa lucha, me dona aicí l'escasença d'o far. Sortís aquesta passa un libre que vau crompar. I cita un mot d'Albert Camus (in L'homme révolté) : "Mais l'enfer n'a qu'un temps, la vie recommence un jour."

Mumu

De Joël Seria, 2010.
Amb Sylvie Testud, Baltazar Dejean de la Bâtie, Jean-François Balmer, Dominique Pinon, Bruno Lochet, Michel Galabru, Héléna Noguerra, Antoine de Caunes.
L'istòria d'un dròlle un pauc tròp pistolet d'après la guèrra de 40 que passa d'escòla en escòla e qu'arriba dins la classa d'una regenta canissa jogada per Sylvie Testud. Ai trobat aquò longuet. S'avètz quicòm mai a far...

Sinhaletica

Lo Conselh general d'Avairon es a pagar a totas las comunas qu'o vòlon dos panèus de dintrada en occitan. N'i a pas qu'un ponhat qu'a refusat (mès daissèm passar 4 ans e tornèm-i). Aquò fa que, dempèi un mes, la lenga d'òc se vei un pauc mai en Roergue e, ieu, aquò m'agrada !

24/04/2010

Causse Mejan

La Mòrt

« Un bèl jorn de plan bon matin
Me'n anèri repotegar
Sola, aissabla, pel camin
Contra la Mòrt qu'èra a dalhar.

La trapèri lèu chal vesin.
Li diguèri : "Pro de tuar !
As pas vergonha, òrra fin ?
Es pas urós, lo cal daissar.

– S'es pas urós de son destin,
Rason de mai per l'emportar !"
Respònd la Mòrt dins son latin.
Vertat qu'èra pas de plorar...

"Aquel còp, as pas a rogir,
Mas quand un enfant vòls cargar,
Que de ta dalha fas patir,
Qunta responsa me pòds far ?

– La Mòrt fa çò que vòl, enfin !"
Degús se pòt amaginar
Res ni mai çò qu'es de seguir.
Moralitat : Daissem-la far. » (J. M.)

E m'endormisse amb aquò

Un òme e una femna

L'ai pas encara dich aicí mès soi una amorosa del cinemà de Claude Lelouch. 1965, ère pas encara nascuda. Aima lo monde, aquel òme, e es ben per aquò que l'aime, ieu.

21/04/2010

Dedicaça especiala per Samaranch

A l'ocasion de sa mòrt, voldriái far a Juan Antonio Samarach - que me sembla pas èsser estat un crane umanista (ni mai un umanista de tot) - la dedicaça d'aquel libre qu'escriguèt Albert Jacquard n'i a qualquas annadas. Soi plan d'acòrdi amb Mossur Jacquard quand ditz que, davant d'assajar de despassar l'altre, caldriá assajar de se despassar se-mème (e pensa çò mème de las nòtas a l'escòla). Juan Antonio Samarach representa las annadas ont l'argent e la dròga se son metuts a enverenar l'espòrt mondial. Çò mai important es pas d'èsser als Jòcs, es d'i èsser per far d'argent. Cadun vòl son tròç d'argent e ieu m'agrada pas aquela societat.

15/04/2010

Polonha


Cercave quicòm per parlar del crash del Tupolev del president polonés, Lech Kaczynski, de la siá femna, d'un fais de monde plan establits a la cima de l'Estat polonés e d'altras personas totas defuntadas dins aquel accident (dissabte 10 d'abrial, 95 mòrts) mès ai pas trobat qu'aquò... Si que non, aviái ben aquò...


...mès aquò seriá estat de missant gost.
[Lo tot dins Courrier international]

08/04/2010

Nadau a Anglars-Sant-Faliç (12) lo 4 de junh

Anglars-Sant-Faliç es tot pròche de Rinhac. Entremièg Rodés e Vilafranca de Roergue, se volètz. I serai, de segur. Per crompar las plaças : 05-65-80-26-04.

06/04/2010

Jornada plombada

Vese ben que vos vau plombar aquela crana jornada de prima mès ai aquò dins lo cap. Alara, me diretz, perqué pas la version de Léo Ferré ? E ben per çò que Dadida es una persona que m'a totjorn tocada e qu'ai aicí l'escasença de parlar d'ela (mès l'auriái ben fach un jorn). Quand ère pichona e que tot lo monde se fotiá d'ela, me metiái dins de colèras negras. Li caliá pas tocar. E la trobave talament polida ! En 81, èra davant, dins una rauba de mossalina ròsa, per anar sus la tomba de Jaurès al Panteòn. Farà lèu 23 ans qu'a causida sa sortida.

04/04/2010

Sul causse pas luènh de Severac lo Castèl

Per far rampèu a Mela.

Benjamin Biolay

Lo vau anar veire en concèrt a Ramon-Vila (la vila dels Ramon de Tolosa ?) lo 27 de mai. Aime fòrça aquela cançon, amb Marilyn que canta al mièg.

De mots

La lectura es una amistat.
Òm pòt acculturar sens desculturar.
La preson priva los òmes de lor libertat, pas de totes los dreches de l'òme.
Ma bibliotèca es una calda forradura.
Lo monde a començat sens l'òme e s'acabarà sens el.
Èsser d'idèia (èsser d'acòrdi).
Se la conariá èra una moneda, Sarah Palin poiriá salvar Wall Street.
Lo melhor mercat es lo mai car.
Dieu crei a la publicitat. La pròba : a metut de campanas dins sas glèisas.
Temps d'Occidental : de las crompas d'un Nadal a las crompas d'un altre Nadal.
Ajustar de vida a las annadas e non d'annadas a la vida.
Qu'a sachut aimar la Tèrra a aimat l'eternitat.
Quand l'òme aurà pas pus de plaça per la natura, benlèu que la natura aurà pas pus de plaça per l'òme.
Viure tua.
Òm nos ensenha a viure quand la vida es passada.
Cultura : memòria del pòble, consciéncia collectiva de la contunha istorica.
Se far una idèia justa e pas just una idèia.
Se Diu aimava talament las femnas, n'auriá una.
Òm pòt manjar totas las menas de mossarons, al mens un còp.
La sola frontièira d'Euròpa es la democracia.