06/10/2010

Un òme sus dos es una femna

Vene d'acabar aquel libre de Gisèle Halimi, una capuda, tornar. Pichona, en Tunisia, volguèt ja pas dintrar dins la religion que li ensenhava sa maire (èra filha de rabin). Podiá pas endurar d'ausir los òmes començar lor jornada per aquela pregària : "Benesit siá l'Eternèl que m'a pas fach femna." E se metèt en cauma de la fam, a l'ostal, per çò que voliá pas servir sos fraires. A 15 ans, sa maire li diguèt que deviá gardar son còrs per un òme. Coma se son còrs èra pas seun. Venguèt avocata e, après lo manifesta de las 343 salòpas de 1971 (343 femnas - Deneuve, Duras, Beauvoir, Sagan, Halimi… - reconeissián qu'avián ja avortat dins la clandestinitat), la lei pel drech a l'avòrtament siaguèt votada (1975). "La contracepcion : ma libertat ; l'avòrtament : mon darrièr recors ; balhar la vida : ma causida."
Es de totas las luchas per lo drech de las femnas (contra la prostitucion, contra las maires-portairas e lo comèrci dels còrs, per una adopcion mai aisida, per la paritat en politica…). Pel moment, trabalha a far passar l'idèia de prene las melhoras leis per las femnas dins cada país d'Euròpa per las far aplicar dins totes los paisses d'Euròpa.

5 commentaires:

JP la rapieta a dit…

Au jorn d'auèi, nos manca de la gent entau, segur. Mas i avia beleu 'n'epoca mens meschenta 'qu'aquela que vivem.

Patricia a dit…

I a avut un temps que las femnas votavan pas, que avián pas lo drech d'avure un compte en banca, que se devián maridar coma lo volián los parents... Non, urosament es darrièr naltres, aquò... Mas i a encara a far !

Florenci Salesas a dit…

Quand me dison qu'uèi las femnas an ja los meteisses dreches que los òmes, me meti totjorn a rire. Aiçò es pas vertat, e parli quitament sens sortir de las nòstras societats occidentalas, tan "democraticas" e modèrnas elas, que se permeton donar de leiçons de libertat e egalitat als autres. Dempuèi una causa tan simpla coma qu'una femna qu'aurà un grand talent a fotbòl serà jamai una estela coma Leo Mesi fins a cèrts abuses e pressions que son encara fachas amb impunitat dins l'airal privat, al trebalh... Es tanben fòrça cèrt que i a fòrça femnas que dins l'airal privat abusan de bones òmes amb chantatges emocionales de tota sòrta e aiçò es qualquarren que se vei rarament rebatut en cap de estatistica. Las injustícias son totjorn d'injustícias, impòrta pas d'ont e cap ailà ont anen e tot genre e classa sociala es susceptibla de las cometre. Un còp dich aiçò, demòra un camin fòrça long perque la femna siá vista aital coma un òme, al meteis nivèl. Fa vergonha qu'a aquelas nautors de l'istòria siá encara notícia qu'una femna siá la presidenta de Brasil, per exemple. Solament aiçò demòstra que sèm fòrça endarrierats. Fa pas èrem gaire a la preistòria en aquel afar. Ara benlèu començam ja a crosar la linha que separa l'edat mièja a la modèrna. Esperi impacient quand arribarem a l'edat normala e justa de vertat, aquela en la que degun metrà cara d'estonament quand se produsisson de faches que lor caldriá èsser absoludament comuns.

Salut :)

k a dit…

sèm dins lo temps que i a mai en mai de femnas que pòrtan lo vel e que nos explican qu'es lor religion!
euròpa per qualas femnas?

Patricia a dit…

@ Florenci : levat que coneissi pas Leo Mesi :) as rason, quora aurem una femna presidenta aicí ? Mitterand n'aviá mesa una premièira ministra, a pas fach long fuòc...
@ k : una Euròpa per las femnas veladas tanben (s'aquò las amusan) mas que respectaràn la laïcitat de las altras femnas.