19/09/2010

Lo camin de Sant-Jaume

- Que "Le nouveau monde" e "Dallas" se trapan pas luènh del Pòg.
- Que lo Pòg de Velai es una vilòta plena d'estatuas de la Vièrja (t'estofan de tant que n'i a e de tant que son bèlas).
- Qu'al Pòg i se fa, lo mes de setembre, una fèsta Renaissença que dura una setmana per designar lo "Rei de l'Aucèl" (li cal davalar un aucèl amb un arc). De notar que lo Rei pòt èsser una Reina.
- Que dins la region del Pòg, l'occitanitat del luòc es pas gaire revendicada (l'ai cercada, la pancarta "Rei de l'Aucèl" ! E n'ai pas vista qu'una...).
- Que se vas a la messa de 7 oras (!), lo curat te benesís e te balha una medalha, qu'aquela medalha es un present mès que la Creanciala te costarà 5 euròs (la Creanciala es una mena de passapòrt que te cal far tamponar end t'arrestas per la nuèch).
- Que, se vòls, pòdes escriure un vòt sus un papièiron, après la messa, davant de partir de la catedrala e prene dins lo panièiron lo vòt de qualqu'un mai.
- Que de montar a la catedrala del Pòg te pòt ja decoratjar d'entemenar lo Camin.
- Que lo Camin se pòt far a 80 ans.
- Que sul Camin se tròba pas un fum d'aubèrjas.
- Que la conariá umana se tròba tanben sul Camin e qu'as lo drech d'emmerdar los que te dison (dins lor tolerància catolica) que se pòrtas pas una saca pesugassa siás pas una pelegrina vertadièira (an pas qu'a lo far de genolhons, elses, se vòlon, e se far gimblar a cada crotz tanben).
- Que los Canadians parlan de longa.
- Que las femnas, aquò pissa bravament la nuèch.
- Que la cauquilha es reservada a los qu'an ja fach lo Camin duscas a Sant-Jaume (e doncas que n'i a que fan lo Camin mai d'un còp).
- Que i a de cimes de lièches e que, s'as pas ta bomba especiala, te fas fissar coma un can per de nièiras.
- Que 25 quilòmèstres per jorn es ben pro per ieu.
- Que i a pas de melhor biais per descobrir un país que d'o far a pè.
- Que se siás dins tas pensadas, te pòdes enganar e sègre un altre camin (e aquí as lo drech de renegar).
- Que lo Camin de Sant-Jaume es ça que la un afar de joves retirats e que los joves retirats en cobles, aquò fa de bruch lo matin (de notar que los sexagenaris son pas estats plan dondats : "Martina ! ma servièta ! Martina ! un parelh de calcetas ! Martina ! as pas acabat de barrar las sacas ? Cal anar desjunar !").
- Que seriá plan d'o far d'una tira (cal just avure un pauc mai de 2 meses davant se).
- Que tos pès son de bens precioses e que cal pas emblidar de t'estirar lo ser, amai se siás lassa.
- Qu'atapas una brava paur cada còp qu'un correire t'arriba darrèr.
- Qu'es possible de s'endormir a 8 oras del ser.
- Qu'es un plaser sens nom d'èsser defòra a poncha de jorn.
- Qu'ai plan fach de partir al temps de las amoras.
- Que, quand siás del Causse, tròbas un pauc grisa la pèira de barena.
- Que los cans n'an pas pus res a far de veire passar de pelegrins (son jaguts sul costat e levan mème pas lo cap per t'agachar).
- Que la curiositat te buta totjorn per saupre de qué i a darrèr la truca qu'as davant tu.
- Que gaireben la mitat dels pelegrins caminan sols.
- Que s'en caminant ausisses lo "Se canta" darrèr tu, te cal pas creire ja al Paradís (es pas qu'una Melania de Caòrs que canta tot lo jorn).
- Que, generalament, lo monde del país t'agachan amistosament.
- Que pòdes passar a Saugas sens te far manjar per la Bèstia del Gavaldan.
- Que se, al mièg d'una faja, veses escrich lo mot "fesse" sus una pèirassa, te cal pas inquietar (benlèu qu'aquò va melhor un còp escrich, qual sap ?).
- Qu'es pas gaire plasent de passar a pè jost una linha de nalta tension.
- Qu'entre la canòla del Camel bag e las doas canas qu'an la maja part dels pelegrins, te pòdes creire a l'espital ("clic, clic, clic…").
- Qu'as pas a èsser fissada se, a la fin de la jornada, un païsan que fa de fuèlhs te ditz : "E ben, anatz ben dapasseton, vos..."
- Qu'òm se pòt far d'amics sul Camin. :)

4 commentaires:

Georges d'Humières a dit…

Que per un uganaud coma ièu es possible de caminar ambe de catolics...

Qu'un uganaud camina coma los autres, es a dire pas pus ambe d'esclòps mas de cauçaduras plan adaptadas...
e sens doblidar la seuna Biblia!

Patricia a dit…

- Que per una atèa coma ieu es tanben possible de far lo Camin. :)

Mela a dit…

M'agrada ta lista.

Florenci Salesas a dit…

Lo pièger d'aquelas situacions es que contunhan pas en la tiá vida quotidiàna. Subitament, vives una desconnexion totala del qu'acostumas a viure cada jorn. Es evident que poiriás pas èsser tota la vida en fasent lo camin de Sant Jacme o en partejant espaci amb aquel grop de personas amb las que vives una experiéncia alhucinanta a Groenlàndia (per imaginar una). Aiçò es dur e lo cervèl e l'esperit a fòrça a digerir. Mas poem esser al camin de sant Jacme o amb aquel grup de Goènlandia tota la nostra vida (òc dins nostre : tot aquò degun nos lo pot raubar :)

Espèri de tot còr qu'o pòscas far. La vida contunha.