21/06/2010

Junh de 2010

• Òsca a l'idèia de metre de fedas dins los pargues urbans per pàisser.
• Òsca a Rama Yade, secretària d'Estat als espòrts, que ditz que la còla de foot francesa deuriá pas èsser dins una ostelariá tan polida en Africa del Sud per la copa del monde. E vergonha a totes los del governament que li tomban dessús.
• Vergonha als caçaires qu'an ara la possibilitat de caçar pertot : s'avèz de tèrras, podètz pas pus defendre als caçaires d'i dintrar, si que non aquò vos costarà 1500 €.
• Vergonha a France Inter que tusta sus sos umoristas (jà Guillon e ara Porte). L'ai escotada la cronica de Porte, s'amaginava que Dominique de Villepin aviá la malautiá de Gilles de La Tourette e li fasiá dire : "J'encule Sarkozy". Ieu, aquò m'a fach rire d'amaginar aquel grandàs rèdde dire aquò. I aviá pas de que metre qualqu'un defòra... Los umoristas son aquí per anar de l'altre costat de la linha, coma Coluche o Desproges a l'epòca. Mès los temps cambian e benlèu que France Inter es de mai en mai als òrdres de l'Estat. Philippe Val, director, se deuriá sovenir de çò que fasiá (e de çò que disiá), el, quand èra liure. E ieu, qu'ère tant urosa de lo veire arribar sus Inter...
• Vergonha a Brice Hortefeux que demòra en plaça (ministre de l'endedins) amai s'es estat condamnat per injúria racista (quand n'i a un aquò va plan, es quand n'i a un fais qu'aquò pausa problèma). Fa apèl. Veirem ben après...
• Vergonha a Christine Boutin (anciana ministra) que s'es vista balhar una mission per Sarkozy per un salari mesadièr de 9500 € (en mai de sa retirada de 6000 € d'anciana parlamentària). Ela que se ditz crestiana, o vei pas qu'es violent d'aprene aquò ? E quantes n'i a qu'an de missions coma aquò ? La violéncia es pas totjorn ont la cresèm. De qué lor cal ? Una revolucion ? (Amb tot aquel sarrabastal, Boutin renoncia a sa paga per la mission mès troba qu'es pas normal de recuolar davant lo vejaire del pòble alara que son salari èra legal. Res l'estrangola pas, ela !)
• Vergonha a la mòrt qu'a presa Ginette Garcin, comediana.
• Òsca al governament britanic que demanda perdon pel Bloody sunday (lo 30-01-1972, l'armada tuèt 14 catolics que manifestavan pacificament en Irlanda del Nòrd). E tornatz escotar la cançon de U2.
• Vergonha a la mòrt qu'a pres José Saramango, escriveire portugués (87 ans), Nobèl de Literatura 1998.
• Vergonha a los que daissaràn escampilhar sus Dien Bien Phu las cendres de Bigeard, defuntat lo 18 de junh. Per parlar pas que d'Algeria, èran sonats "crevettes Bigeard" los Algerians, pès motlats dins de beton, qu'èran escampats vius d'elicoptèr dins Mediterranèa.
• Vergonha a la nòta de 12 000 € de cigarros pagada per l'Estat francés pel secretariat d'Estat al desvolopament manejat per Christian Blanc. Sarratz-vos la cencha, Franceses !
• Òsca a Eva Joly que demanda la demission d'Eric Woerth (ministre del trabalh) qu'a una femna que s'ocupava dels afars de Liliane Bettancourt (L'Oréal, femna la mai rica de França) al moment qu'èra ministre del budget (e que se conflava de far la caça als ricasses amagaires d'argent), ara qu'òm sap que la Bettancourt a un fais d'argent rescondut dins de paradís fiscals. Los enregistraments que mostran aquò dison tanben qu'es estat aconselhat a la Bettancourt de crompar la justicia, en balhant un pauc d'argent al poder en plaça, dins lo plaijadís qu'a amb la siá filha. Eva Joly demanda doncas tanben de cambiar los procuraires dins aquel afar. Pas polit polit tot aquò...
• Òsca a Israèl que leva un bocinon lo blocús sus Gaza.
• Òsca al s Georgians qu'an davalada l'estatua de Staline qu'èra sus la plaça centrala de Gori (end èra nascut en 1879). Aquò s'es fach de nuèch, al rescondut, mès es estat fach...
• Vergonha a France Inter (encara) qu'arresta d'emissions de qualitat e plan escotadas (Et pourtant elle tourne, Esprit critique…).
[Debuta de l'afar Bettencourt-Woerth que se deuriá pas arrestar aquí, se lo país es una democracia vertadièira.]

Aucun commentaire: