22/01/2010

Janvièr de 2010

• Vergonha a la mòrt qu'a presa Lhasa de Sela, 37 ans, cantaira.
• Vergonha a las escòlas bèlas de França que refusan de veire, dins lors efectius, 30 % de borsièrs. Alain Minc (major de l'ENA) e François Pinault (autòdidacte) signan una tribuna comuna dins Lo Monde.
• Vergonha a la mòrt qu'a pres Philippe Séguin a 66 ans. Amai s'èra un pauc tròp soveranista a mon gost, me pense qu'èra un òme drech. E pièi m'aviá fach plaser quand aviá petada la pòrta del RPR vengut UMP quand vegèt cossí aquel partit se virava a drecha, dins una drecha descomplexada. E tanben quand, coma president de la Cor dels Còmptes, aviá criticat las despensas dels Sarkozy a l'Elisèa.
• Vergonha al Japon, a la Norveja e a l'Islanda que contunhan de caçar las balenas (lor caça comerciala es defenduda dempièi 1986).
• Vergonha al sidà qu'a pres Manu Solo a 46 ans. Èra lo filh de Cabu.
• Vergonha a la mòrt qu'a pres Eric Rohmer, 90 ans.
• Vergonha a Patrick Devedjian, ministre, que repotega contra lo Conselh Constitucional.
• Vergonha a Air France que vòl far pagar pus car lo monde que son gròsses.
• Vergonha a Claude Guéant, secretari general de Sarkozy, que ditz que los dos jornalistas de França 3 son estats imprudents. Quin jornalista de guèrra pòt èsser prudent ? Vertat que, el, a pas a avure paur d'èsser pres pels Talibans... Los secretaris deurián demorar a lor plaça de secretari.
• Òsca a Obama que tusta sus las bancas (que tòrnan començar a far las colhas).
• Vergonha a l'indecéncia de la paga dels traders e dels patrons del Cac 40, vengonha als conselhs d'administracion que lor balhan aquelas pagas (sovent mai de 100 000 € per mes). La crisi, aquò's pas que pels pichons.
• Vergonha a la mòrt qu'a pres J. D. Salinger (L'attrape-cœurs).

Aucun commentaire: