26/08/2009

Pichon jòc : end me'n vau deman matin ?

L'ai ! (enfin... dins qualques jorns)

Duèi, ai escotat Art Spiegelman a la radiò e aquò m'a fach pensar qu'aviái notat un jorn, endacòm, que me caldriá crompar "Maus", BD ont los Nazis son de cats, los Josieus de rats, los Americans de cans e los Poloneses de pòrcs. L'istòria de son paire, josieu polonés salvat d'Auschwitz. 
Li fau una pichona plaça dins ma bibliotèca-de-libres-causits, al ras de l'integrala de Persepolis.*
[*Una question : quant de pes (en libres) pòt téner la postada d'un ostal vièlh ?]

Shhh... Shhh...

V'aquí çò que m'encantèt aqueste matin...

Bjork : "It's oh so quiet" (ja cantat en 1951 per Betty Hutton).

25/08/2009

Persepolis 2.0

BD de 10 paginas, facha per Payman e Sina per denonciar las darrièiras eleccions en Iran, amb la benediccion de Marjane Satrapi. L'avètz aquí.

De mots

Quand i a pas pus de vin dins ma barrica, an pas paur de beure mon aiga.
Lo vièlh tombelaire es jagut darrèr lo portal del cementèri, a la dintrada. Aviá demandat aquò per veire passar totes los altres.
Qunta idèia de s'empegar qualqu'un per la vida tota !
Es pas aisit de contentar tot lo monde e son paire.
Èsser trist coma un salés.
L'òm dintra en amistat coma en religion.
Los poètas an pas sovent lo gost de las aventuras colectivas.
L'ase que se'n va en viatge se'n tòrna pas a caval.
Lo Diable : aquel que refusèt de vendre son arma a Dieu.
Lo savi fa dòl de sa mòrt.
Un peçuc de derision salva l'onor de l'òme.
De còps, òm aimariá desrabar son passat amb sas raiças.
Lo plurial val pas res a l'òme e, tanlèu que sèm mai de quatre, sèm una banda de cons.
En tot i a un pichon quicòm.
Fat de cap blanqueja pas jamai.
E vos, de qu'avètz fach dins vòstra vida ? – Ai amassat d'argent.
Es pas a Dieu qu'ai fach plaça mès a ieu. M'apartene.
Seriá doncas mai doç d'aprene que de saupre ?
Comprenon pas lo silenci nimai l'isolament.
A tota causa cal pensar a la fin.

23/08/2009

Goran e Emir al Samontà


Serada laugièira al Samontà amb de monde plasents, al torn d'una musica a la Goran Bregovic-Emir Kusturica. Fa de ben.

21/08/2009

Quand los jornalistas sabon pas end penjar lo lum...

Ma grand ven de batre lo recòrd del monde del 100 mèstres òme, Ben Laden s'es metut a la brodariá e ieu me'n vau passar los trenta ans qu'arriban sus la luna !
La calor, benlèu... De lapidar a còps de clòsques d'olivas !* Agost, lo sòm grand.
[*Òm me ditz dins l'aurelheta que la una amb "Los rics suissas vistes del cèl" es tanben de veire...]

La castelana del Grelh roergàs

Ièr, ai poscut anar veire lo castèl de Zelià Pojada, lo castèl de Sèlvas, al ras de La Vinzèla (pas luènh de Concas). Zelià èra l'amiga d'Enric Molin, regent de La Vinzèla d'aquel moment. Es d'aquí que partiguèt l'idèia de bastir lo Grelh roergàs.
Los parents de Zelià, emplegats de la bòria del castèl de Sèlvas, partiguèron en America e, quand tornèron, posquèron crompar lo castèl (1913). Per ieu que soi del causse, es un pauc tròp un país de cabras alai, mès lo castèl es d'auçada umana, retirat, polit per sa simplicitat. Lo blason, al-dessús de la pòrta, es escrich en òc. Lo castèl es totjorn dins la familha Pojada. Lo posquère veire tot. I auriá pas grand causa a far dedins per l'enlusir tornarmai.


19/08/2009

Agost de 2009

• Vergonha a la bòça que poncha lo nas en China.
• Òsca a Bill Clinton qu'es anat cercar en Corèa del Nòrd las doas jornalistas americanas que i èran retengudas per i far 12 ans de trabalhs forçats. N'ai ja parlat.
• Vergonha al governament del Nepal que vòl balhar d'argent (460 €) als òmes que se maridarián amb una veusa. Puslèu que de cambiar aquelas pauras femnas en biais de ganhar d'argent deurián lor balhar l'argent a elas per lor ofrir una vida melhora...
• Vergonha a la junta birmana que ven d'embarrar, tornarmai, Aung San Suu Kyi dins son ostal per 18 meses... lo temps de daissar passar las eleccions.
• Òsca al Conselh de securitat de l'ONU que s'amassa, sul pic, per soscar a la situacion d'Aung San Suu Kyi, prètz Nobèl de la Patz.
• Vergonha a l'assassinat de Zerema Sadoulaeva, responsabla d'una ONG en Tchetchenia, e de son òme. S'ocupavan de sortir los joves de la misèria per que tombèsson pas dins lo terrorisme.
• Òsca a la liberacion de 4 personas de l'ONG "Accion contra la fam" (2 francesas, 1 belge e 1 bulgar) e 2 pilòts, ostatges en Somalia dempièi 9 meses.
• Òsca al Conselh general d'Avairon que va, dins l'afar de 3 ans, cobrir totas las comunas del departament de panèus de dintrada d'aglomeracion en occitan.
• Vergonha a la violencia que toca (encara mai que de costuma) l'Afganistan davant las eleccions.
• Òsca a la represa dels viatges toristics entre las doas Corèas. De familhas espeltiradas dempièi las annadas 1950 se van poire tornar trobar. L'iniciativa ven de la Corèa del Nòrd... E aquò al moment de la mòrt de Kim Dae-jung, prètz Nobèl de la Patz, ancian president de la Corèa del Sud. I a engana o los temps cambian ?
• Òsca a las edicions Vent Terral que s'ameritan d'èstre mai conegudas.
• Vergonha a la Premsa qu'escampa sens ne saupre mai que Caster Semenya, africana del Sud que ven d'emportar lo recòrd del 800 mèstres, seriá benlèu pas una femna.
• Vergonha a la politica securitària e als gendarmas que se meton a verbalizar los que fuman al volant. Una annada, s'an avut tant de PV, l'annada d'après, pòdon pas far mens. Quand la data arriba, lor cal metre de PV...
• Vergonha a la possibilitat per qualqu'un (amai se se sona Ted Kennedy) de demorar 47 ans dins l'amassada legislativa d'un país.
• Òsca al Japon qu'a votat democrata après 54 ans de drecha.

Lo jornal de Loisa Paulin

« J'aime ma vie parfaitement solitaire, c'est-à-dire parfaitement libre. »
Lo jornal de Loisa Paulin (1888-1944) es escrich en francés. Data d'un temps qu'aviá pas encara començat d'escriure en òc. Es un viatge en Catalonha que li dubriguèt los uèlhs sus sa cultura e sa lenga mairala.
La mòrt li prenguèt sos tres enfants pichons, pièi, amb son òme, divorcèron. Sola, s'apassionèt per la natura, las letras (aimava sa bibliotèca-de-libres-causits mai que tot) e la musica classica. Benlèu que crosèt lo camin d'Emma Calvé (1858-1942) ? Per malastre, una malautiá li prenguèt la vista pichon a pichon e finiguèt per la prene ela a 56 ans. Ai descobèrt aquí una femna talament fòrta ! Una solitària, una femna liura. La me caldrà anar veire... Vos ai metut una breçairòla de Loisa Paulin n'i a qualques temps. L'avèz aquí.

14/08/2009

Malraux

Raube a V. Josse aquesta fòtò presa
a la dintrada d'un cinemà d'Avinhon.

13/08/2009

Observacion

I a pas res a far... L'agache, lo susvelhe de pròche, l'escote e, pel moment, se'n tira pas tròp mal.

12/08/2009

Cresiái qu'èra una galejada...

Una musulmana que se voliá banhar amb son armura ("burkini", nom ipocrit d'aquela pelha) dins una piscina municipala francesa es anada se plànger a la policia que la volián pas daissar dintrar dins l'aiga coma aquò ! 
Où ! los calçons tanben son interdits dins las piscinas municipalas ! Amai las raubas a crinolinas ! Caldriá pas butar tròp la mameta dins las ortigas ! 
Doas solucions per ela : se banha pas (degús es pas encara mòrt de pas se banhar l'estiu a la piscina municipala, nimai endacòm mai, ne sabe quicòm) ; se va banhar dins un riu, a la mar o dins la piscina d'un amic qu'a d'umor. Una darrièira solucion : se va banhar dins la piscina municipala d'un país qu'es pas laïc.

[Comentari d'una filhòta qu'agachava mon blòg : "A ? As metut una Barbapapa ?"]

11/08/2009

Amb d'uèlhs d'enfant

Aqueste ser, me soi meravilhada a agachar la capa del cèl
e sas estelas fialentas, amai se los vòts son pas per ieu.

10/08/2009

Sosten a Clotilde Reiss

Francesa de 24 ans, retenguda dempièi lo 1èr de julhet en Iran per avure pres de fòtòs, après las eleccions, de la reguitnada de l'oposicion a Ahmadinejad, e mandat de mèls content las manifestacions per internet.

05/08/2009

Lo libre de Nadau

Après lo concèrt de l'Estivada, ai comandat lo libre sus Nadau.
1. Es plan polit : polidas fòtòs, polida maqueta.
2. 10 cançons i son espepissadas.
3. L'òm vei cossí Joan de Nadau es un poèta vertadièr (sabètz, un d'aquelses que vos sortisson de causas bèlas amb de mots que vos semblan tant aisits a trobar, veire Brassens), un òme de còr qu'assumís sa cultura, un òme verai-qu'a-pas-besonh-de-Rolex-per-èsser-urós.
4. Nadau es una polida istòria colectiva.

03/08/2009

Escambi amb un vièlh-con-que-se-crei-arribat*

« Ieu, lo patoès, soi contra.
– Contra ? A ? Un : aquò's pas un patoès mès la lenga d'òc. Lenga d'òc / lenga d'oil, n'avètz ausit parlar ? Dos : e ieu que me pensave qu'èretz un intellectual… »
Fin de la discutida.
(*Per çò qu'es ric, qu'a un ostalàs e que fa de recèrcas genealogicas)

Escambi amb un pompièr

« Siás tot jove, 22 ans, aquò's pas un pauc pesuc, de còps, d'arribar sus un accident, quand i a d'enfants, de mòrts ?
– Non pas ! Nimai quand anam davalar de penjats, non... Lo melhor moment, aquò's quand sèm dins l'ostal e que sabèm pas dins qunta pèça es lo penjat... Sèm talament dins nòstre trabalh que pensam pas pus a la vida vertadièira. Al contrari, i a una excitacion ! De còps, quand sèm de garda e que se passa pas res, sèm pas contents. Nos disèm : "Se i podiá avure un bon carton, aqueste ser !"
– ?!? »