16/11/2009

Son venguts calucs !

Missant temps :
- Lo 11 de novembre, parlave d'aquel monde del Rotary club de Rodés que daissèron montar lo pichon pòble roergàs dins lor Ferrari o lor Porsche, pièi los anèron far caminar sus un parcors de gòlf (tocatz ma bòça monsénher) per adujar la recèrca contra lo cancèr (notatz qu'adujan a luchar contra de causas que, quand lor tomban sus la maissa, se'n pòdon pas parar amb lor argent : la malautiá, lo vielhum).
- En fin de setmana, aprenguèrem que Monica Belluci èra anada passar una serada a 190 000 € amb la filha del dictator osbèc. Benlèu qu'aviá talent...
- Aquesta dimenjada un ricàs volguèt balhar de bilhets de banca (de 5 a 500 €) al monde dins París. 7000 personas venguèron esperar lor bilhèt mès los bilhèts tombèron pas : encanissament, violéncia. S'aquò ne vira, l'operacion mediatica es estada montada pas que per se trufar del paure monde qu'esperavan, cais dubèrt cap al cèl, que la manna davalèssa (vos sovenètz de Balasko dins lo parking, quand fa la majoreta dins "Nuit d'ivresse" ?).
- Duèi, lo tipe qu'aviá fugit amb son camion plen de sòusses es tornat a la gàbia tote sol. Sai qu'aviá pas encara lo nivèl de descomplexion necessari... L'opinion, de tant de sadol d'aquela umiliacion, d'aquela vulgaritat al cap de l'Estat, s'èra presa d'amistat per aquel panaire qu'èra partit dapasseton amb 11,6 milions d'euròs dins son camionet.
Mèfi, la descomplexion poiriá venir contagiosa !

1 commentaire:

Jòrdi d'Olmières a dit…

Plan mercé per la pichona cronica e de m'aver contactat sus mon blog