18/11/2009

Novembre de 2009

• Òsca a Eva Joly que ditz que l'immunitat presidenciala es una absurditat d'un altre temps. Ajustarai : coma lo drech de gràcia.
• Vergonha a la mòrt qu'a pres Claude Lévi-Strauss (1908-2009) coma aviá pres Jean-Pierre Vernant (1914-2007), Pierre Vidal-Naquet (1930-2006) o Germaine Tillion (1907-2008).
• Òsca a la justicia francesa que fa son trabalh : Pasqua, Flosse, Chirac, Tibéry, aquò fa un pauc tontons flingaires, non ? Cresètz que sabon jogar a la belòta ?
• Òsca als senators UMP que vòlon pas de la supression de la taxa profesionala tala que la vòlon suprimir.
• Vergonha al poder tunisian qu'a embarrat lo jornalista Taoufik Ben Brik. Aquò contunha dins lo bon sens...
• Òsca a la confleta Sarkozy que me fa crebar de rire quand conta sus son Faceboc qu'èra a Berlin lo 9 de novembre de 1989 (amb fòtò d'el a picar la paret amb un martèl) alara que sembla que i èra pas. Après "Nicolas a Berlin", veirem lèu "Nicolas a Poitiers" (amb fòtò d'el rescondut darrèr Carles Martèl) o "Nicolas a la batalha de Tolosa" (amb fòtò d'el a assajar de reviscolar Simon de Montfòrt).
• Òsca a ieu que fau pas cas de totas las conariás que sortís la "còla de sòmi" Hortefeux-Lefèbvre-Besson* (atencion, lo nivèl es pro pro nalt) pas que per s'amigadar lo monde del FN. (*Me cal ajustar Raoult)
• Òsca a la demanda de condamnacion de Total (375 000 €, una pecadilha per elses mès bon...) per sa responsabilitat dins lo prejudici ecologic qu'a constituit lo naufragi de l'Erika en 1999 fàcia a Bretanha (400 quilòmèstres de còstas tocadas e mai de 150 000 aucèls empegats).
• Òsca als ensenhaires reguitnaires (aquí los Roergasses) que vòlon pas de la refòrma Darcos ni mai del fichièr basa-escolans.
• Òsca a la presencia d' Angela Merkel a París per la ceremonia del 11 de novembre.
• Vergonha a la pena de mòrt que tòrna ponchar lo nas en Russia e vergonha a aquel patron de partit drechièr que voldriá que l'òm assaja de remèdis novèls suls condamnats davant de los tuar.
• Òsca a Erdogan, premièr ministre turc que ven de permetre a la lenga kurda de dintrar dins la vida politica del país.
• Vergonha a l'idèia nacionalista de la França a la Chevènement-Pasqua-Séguin que Sarkozy nos servís dins l'encastre de la discutida sus l'identitat nacionala, juste davant las eleccions regionalas.
• Vergonha al ministre de la cultura Frédéric Mitterand que vòl pas intervenir dins l'afar Eric Raoult-Marie Ndiaye. Un deputat demanda al prètz Goncourt 2009 de se calar sus la politica nacionala francesa e aquò lo regarda pas, lo ministre de la cultura ?
• Òsca a la letra de Jean Daniel a Ben Ali per la liberacion del jornalista embarrat Taoufik Ben Brik (aquí).
• Vergonha a la premsa qu'emplega encara lo mot d'umorista per designar Dieudonné.
• Vergonha a la mòrt que prenguèt Gérard Philippe n'i a 50 ans, qualqu'un qu'èra plan mai qu'un actor de teatre e de cinemà : un umanista.
• Vergonha als 7 quilòs de TNT qu'an petat jol tren St-Pétersbourg-Moscou : al mens 25 mòrts.

Aucun commentaire: