25/10/2009

Una capitada

Soi partida per Carcassona divendres a ser per poire far un pauc de torisme lo dissabte matin. D'unses se fotèron de ieu que davalère per Tolosa alara que m'auriá calgut davalar per Besièrs e Narbona. "Lo còp que ven o farai…" coma ditz Joan lo Nèci.
Lo divendres a ser, dintrère dins l'afar de tira : un bus de las valadas occitanas d'Italia e un altre de Catalonha arribèron a mon ostelariá a doas oras del matin. Posquère far de comparasons linguisticas, que se tanquèron (me semblèt) totes davant la pòrta de ma cambra pendent mai d'una mièjorada !
Lo dissabte matin me soi doncas passejada dins la Ciutat de Carcassona. Booooooon Diuuuuuuuu, qu'es polida ! E non, coneissiái pas enacara ! Me caldriá sortir un pauc de ma tuta... Après un bon estamal (un cafè a 1,80 € e una chocolatina a 1 €), tornère davalar dins la vila bassa, una bastida (aquò me cambia...), per anar al rescontre dels meuns. Aquí vegère fòrça monde que coneissiái (de blogaires coneguts de vista, los altres, los cerque encara...) e m'agradèt tanben de trobar los del Larzac. Totjorn la lucha del pichon contra lo bèl.
A la debuta de la manifestacion anère completament davant per poire veire passar tot lo monde e far lo mai possible de fòtòs. Sabètz que i soi demorada un briu a agachar passar aquela cordelada de monde ! E pertot : la fèsta, la musica, la dança. Pièi, me soi negada dins los caminaires per montar cap a la Ciutat. Sul pont vièlh, lo monde cantavan L'immortèla de Nadau. Dins las carrièiras, los drapèus occitans s'espandissián a las fenèstras. Lo monde nos saludavan. Una femna vièlha (la devètz totes avure vista) nos mandava de potons, braces dubèrts. Per malastre, al cap d'un moment, mon aparelh fòtò volguèt pas pus saupre res : pilas out. Macassiu ! Posquère pas prene la pregària que li aviá d'escricha sus l'estatua de la Vièrja après lo pont. La traparai endacòm. Arribère dins los prumièrs al cap de la passejada e aquí calguèt esperar bèl briu que tot lo monde arribèsse. Òm bolega pas mai de 20000 personas coma aquò... Totjorn n'arribava ! Languisse de veire las fòtòs dels altres. La tièira de monde roja e jauna entremièg las parets de la Ciutat èra un crane plaser pels uèlhs e pel còr.
Après, anère a la messa. Òc, los que me coneissètz, avètz plan legit. Soi coma Brassens quand cantava "sans le latin, sans le latin, la messe nous emmerde". Ieu, la messa en òc, l'endure. Los lums de la glèisa èran bandats, aquò fa que la messa se fasquèt dins l'escur. Messa escura en òc, amb Copa Santa e Se canta a la fin, drapèus occitans e catalans remenats. Susprenent.
Lo ser, davalère escotar çò qu'èra donat sus la plaça de la vila bassa mès agère pas lo coratge d'anar escotar los concèrts de Vilagalhenc per acabar la serada. Dintrère dormir. Lo matin, après avure fach encara qualques estudis linguistics amb los Italians e los Catalans que se'n anavan bona ora e totjorn recampats davant ma pòrta, prenguère lo camin del retorn*. Arribada a l'ostal, fasquère tres oras de plangièira. Caliá ben aquò...
*Ai emblidat de vos contar que, quand prenguère la rota a dètz oras manca un quart, plan dònda, France Inter s'aluquèt e la votz d'Yvan Levaï se fasquèt ausir. "Ten, an cambiada la grilha a France Inter ? La revista de Premsa d'Yvan Levaï es a uèch oras e mièja, de costuma..." E aquí, mon cervèl de blonda fasquèt una escarabissonda : aviam cambiada l'ora dins la nuèch ! Èra nòu oras manca un quart ! E sai pas plan a quanta ora los Italians e los Catalans se son atropelats davant ma pòrta... S'aviái sachut, ne seriái estada aissa !

4 commentaires:

Mela a dit…

A, la blooooooooooonda, es passada per Tolosa OAF OAF OAF.


Los de las Valadas + de CAtalans , totes de muts qué, e de muts que parlan pas fòrt. LOL. As pas d'astre.
Enfin, per un còp que venon pas parlar dabans la miuna de pòrta.

Ben, finala, ton dròlle, lo veguèri pas! :(

manjacostel a dit…

e òc una brava capitada , que soi tornat cansat mas uros...

Mela a dit…

Blonda al cairat...

Anonyme a dit…

Bonser,

de la fotografias, n'i a plen aqui
http://eve.seguier.free.fr/manifcarca/