14/10/2009

Octobre de 2009

• Vergonha a aquela costuma sarkosenca de fargar una lei cada còp qu'arriba un fach divèrs.
• Òsca a la justicia que tòrna dubrir lo dorsièr Ben Barka (contestaire del rei del Maròc Hassan II, enlevat e desaparegut a París en 1965). 4 Marocans son meses en causa.
• Vergonha a la justicia que tòrna tampar lo dorsièr Ben Barka. 4 Marocans son pas pus meses en causa. (?!?)
• Vergonha a l'idèia de balhar d'argent a las escòlas qu'auràn lo mens d'absenteisme (Creteil). Quora arrestarem de far dintrar l'argent pertot ?
• Vergonha a la junta birmana que va gardar Aung San Suu Kyi embarrada pendent 18 meses (lo temps de daissar passar las eleccions).
• Vergonha a Moussa Dadis Camara, cap de la junta militària al poder en Guinée-Conakry, que ditz qu'aquò's pas el qu'a comandat a l'armada de tirar coma de lapins de manifestants lo 28 de setembre, que "lo president Dadis èra dins son burèu"... Parla a la tresena persona, aquel òme. Cabord, l'ai ja dich.
• Òsca a la capitada del "referendum off" organizat pels emplegats de La Pòsta contra la privatizacion d'aquela.
• Vergonha a Didier Lombard, patron d'Orange, que ditz que "la pesca als muscles [aquel lo m'a calgut cercar dins lo diccionari, auriái ben escrich "las molas"], aquò's acabat." Comprene : la vida de "fonccionari", aquò's acabat. Ara, aquò's : salt bèl dempièi un viaducte. Quand France-Telecom es estada privatizada, coma i aviá tròp de monde, es de notorietat que la politica de l'ostal es estada de butar los salariats a la depression nerviosa per que se'n anèsson totes sols. Perqué aquelses qu'an menada conscientament aquela òrra politica serián pas embestiats, ara ?
• Vergonha a la mòrt qu'a presa Mercedes Sosa, cantaira argentina umanista.
• Vergonha a Corbeil-Essonnes qu'a elegit l'òme [dubertament] de palha de Serge Dassault (condamnat a 1 an d'inegibilibat).
• Vergonha a Eric Besson e sos amics (Sarkozy, Kouchner) que van metre dins un avion per l'Afghanistan de monde qu'èran dins la "jungle" de Calais. Kouchner, o cossí passar d'un french doctor a una conifla. [Se kochnerizar : renegar tot çò qu'èrem per petar pus nalt que son trauc e creire d'existir. L'adjectiu s'emplega doncas pas per Besson que, per se kochnerizar, cal èsser estat qualqu'un de davant.]
• Vergonha als comolaires de mandats. Se l'òm començava per balhar pas qu'una indemnitat (la del mandat lo mai pagat), veiretz que serián pas tan lèstes per prene totes los pòstes d'endejóst e que lo monde politic se renovelariá un pauc mai.
• Òsca a la Cor constitucionala italiana que ven de permetre las perseguidas judiciàrias contra Berlusconi per corrupcion.
• Vergonha a aquel bruch fach a l'entorn del libre de Frédéric Mitterand sortit n'i a quatre ans. Es alara que se'n caliá mainar. S'aquel òme ric e poderós es anat far de torisme sexual en Asia (qu'o conte dins un libre per se far de ben) e qu'aquò's defendut per una lei, de qué caliá far ? Çò que se seriá fach per un altre, omosexual o eterosexual. Pas mai. Pas mens.
• Vergonha a l'atribucion del Nobèl de la Patz a Barack Obama. De qu'a fach pel moment ? Es estat elegit. Bon. Nobèl de las bonas intencions, òc. Cal pasmens dire qu'es al cap d'un país que practica la pena de mòrt dins fòrça Estats. E Gandhi, nominat 3 còps e qu'o es pas jamai estat, Nobèl de la Patz...
• Òsca a l'amigadament Turquia-Armenia.
• Vergonha als elegits UMP qu'engolan de sèrps a molons e que dison pas mot de las practicas de lors amics (Dassault que se ritz publicament de far la nica a la justicia, Jean (Ali) Sarkozy, 23 ans, sens cap de diplòma, e que va devenir, per la volontat de cortesans, patron del pus bèl quartièr d'afars d'Euròpa). Pasqua e los Balkani lo sostenon, es a morir de rire. Al princi Joan : un pauc d'umilitat, paure piòt ! Res los estrangola pas... E òsca als Chineses que se trufan.
• Òsca a l'embarrament en preson dins de pèças individualas.
• Òsca al rescontre Jean-Claude Carrière-Umberto Eco ("N'espérez pas vous débarrasser des livres" a cò de Grasset).
• Òsca a l'inventivitat desplegada sul oèb per se trufar de Jean Sarkozy. Los cortesans n'engolan lor capèl, MDR. Lo pòble reguitna, òsca !
• Vergonha als cortesans qu'an elegit David Douillet (ex-judocà e amic dels Chirac) deputat de Las Ivelinas. Lo còp que ven, serà Loanà.
• Vergonha a ieu que soi pas anada escotar Joan Baez que passava a Rodés.
• Vergonha a la França que ven de metre dins un avion per Kaboul 3 Afgans sens papièrs. Ai vergonha.
• Vergonha als lecaires de people de l'Amassada nacionala que fan fèsta a David Douillet. Amagine çò que va èsser quand serà Loanà...
• Vergonha a Ben Ali que serà encara elegit (pel 5e còp) al cap de la Tunisia.
• Òsca als ensenhaires qu'aprofechan d'èsser forçats de legir la letra de Guy Môquet per parlar als escolans de la resisténcia... dels fonccionaris contra l'Estat.
• Òsca a Jean Sarkozy que se presentarà pas a la presidéncia de l'EPAD mès vergonha a el que ditz qu'aquò's pas un problèma de legitimitat e qu'auriá pas volgut ausir dire que seriá estat favorizat. Mdr. Sai pas per de qué renoncia mès aquò's pas per umilitat.
• Vergonha a la reeleccion de Ben Ali al cap de la Tunisia. A un filh ?
• Òsca a la dubertura de la discutida sus las identitats nacionalas francesas. Prenèm-los al mot.
• Òsca al saquejadís del cocotièr de l'Angolagate. Marcamal se passeja enfin !
• Òsca al trabalh de la còla de Yann Barthès sus Canal +.

Aucun commentaire: