28/10/2009

Le scaphandre et le papillon

De Julian Schnabel, 2007.
Amb Mathieu Amalric, Emmanuelle Seigner, Anne Consigny, Marie-José Croze…
Aqueste ser, serada television. Fau lo torn de las cadenas per veire de qué i a e vese que passan aquel film. En 2007, l'aviái pas volgut anar veire. Sosque un momenton, mete la bona cadena, a començat, lo film. Tròp tard, demòre.
Es l'istòria vertadièira de Jean-Dominique Bauby, patron de ELLE, qu'a fach un AVC e que se retròba a l'espital, embarrat dins son còrs. En preson. Pòt pas pus res far, ni remenar, ni parlar : sonque un uèlh bolega encara. Mès a pas perdut lo cap. Dedins, es viu. Una ortofonista va alara dintrar en comunicacion amb el al mejan de las letras de l'alfabet que li va recitar dins l'òrdre d'aparicion lo mai frequent dins la lenga francesa. Cada còp que vòl causir una letra, la fa arrestar de recitar en barrent son uèlh. Farga totes sos mots coma aquò. Un suplici mès atanben una desliurança. Atal fasquèron lo libre de sas pensadas totes dos, letra per letra. Pensadas tarriblas mès, al mièg del malastre, tot còp : l'ironia. Jean-Dominique Bauby moriguèt tres jorns après la parucion del libre.
Realisacion especiala per descriure aquela situacion especiala. Mathieu Amalric es pas de creire. Òm lo vei pas pro, aquel. E Anne Consigny es tan justa... Ela tanben, la vesèm pas pro al cinemà.

Aucun commentaire: