21/09/2009

Setembre de 2009

• Vergonha a l'assassinat del realisator e fotograf Christian Poveda, 54 ans, que trabalhava al Savador sus la guèrra dels gangs. Aviá cobèrt la guèrra en Iran, aquela d'Irac, la del Liban... Òrra novèla al moment que se debana "Visa pour l'image" a Perpinhan.
• Vergonha a l'eleccion d'Ali Bongo (filh de) al Gabon e vergonha a totas las Republicas ereditàrias. Mai lo monde se fan prautir, mai ne tòrnan demandar. Masoquisme dels òmes. Las bancas, los vendeires d'ostalasses franceses e los defendeires de la politica-africana-de-papà ne van encara aprofechar pendent 40 ans.
• Vergonha a Israël que contunha de s'espandir dins los territòris ocupats.
• Vergonha als motards de la gendarmariá nacioanala que se passejan en camiseta. Crentan pas las brutladuras als coides ? Benlèu qu'escavèlan pas jamai, elses...
• Vergonha a la França que fa mina de comprene pas per de que es espitlada après la reeleccion d'Ali Bongo al Gabon. Comprene mème pas, ieu, cossí fan aquel monde per servar lors noms de vilas en francés.
• Vergonha a Total qu'engraissa la junta birmana, junta que pren de fòrça la tèrra als païsans per far passar los oleoducs.
• Òsca a La Republica e a L'Unita, gaireben los sols jornals italians a far la nica al coetaire vièlh Berlusconi.
• Òsca a Obama que vòl balhar una cobèrta santat a tot son pòble.
• Vergonha a Brice Hortefeux que nos pren per de cons. Escotatz plan la conversacion a l'entorn d'el e veiretz cossí nos mespresa en diguent que parla dels Auvernhasses : aquí. [C'est l'intégration. (…) Il est parfaitement intégré, il mange du cochon et boit de la bière. – Il ne correspond pas du tout au prototype. Il en faut toujours un. Quand il y en a un ça va. C'est quand il y en a beaucoup qu'il y a des problèmes.] A fach la pròba qu'aviá un umor mai que dobtós, mès aquò m'encanissa mens que de veire qu'après nos pren per d'ases (perdon a totes los ases, saumas, saumetas e asenons). Lo ministre de l'Endedins nos pren per de nècis, de coniflas, de piòts, d'aflaquits del cervèl ! De tot biais, coma lo mot "demission" a desaparegut del vocabulari politic dempièi un briu, crese ben qu'avèm pas res a esperar. Vos sovenètz, vos, del darrièr o de la darrièira qu'a demissionat ? E pièi, es lo pairin del pichon Joan...
• Vergonha a Sarkozy que ditz qu'an quicòm mai a far al governament que de pèrdre de temps amb aquela istòria d'Hortefeux. Qu'un ministre mespresa publicament los Franceses, vertat qu'aquò's pas brica importent per de monde que, de tot biais, demoraràn en plaça.
• Vergonha a la mòrt qu'a pres Willy Ronis.
• Vergonha a ieu qu'aprene ara que de tròces de "La grande vadrouille" son estats virats chas ieu, al Clapàs-Vièlh (Montpelièr lo Vièlh).
• Vergonha a la condicion dels paures migrants d'Africa qu'assajan de venir cap a un monde melhor dins d'embarcacions de fortuna.
• Òsca a la condamnacion a 18 meses de preson de Charles Pasqua. Caldriá pas qu'aquò l'empache d'èsser candidat en 2012...
• Òsca al coratge de Dominique de Villepin [Je suis ici par la volonté, par l'acharnement d'un homme : Nicolas Sarkozy), acusat dins lo procès Clearstream, contra lo president de la Republica, aquel qu'a la man sus la justicia del país.
• Òsca a l'eleccion de la bulgara Irina Bokova al cap de l'UNESCO.
• Òsca a l'annada de preson demandada contra Dieudonné, asirós dangieirós e missant.
• Òsca a Eva Joly que conta que l'UMP va presentar David Douillet a Poissy (78) per las legislativas alara qu'a de comptes dins de bancas offshore. E vergonha a las ipocritas declaracions contra los paradises fiscals. Anatz quèrre "paradis fiscaux" dins Google, veretz (aicí) !
• Òsca a l'arribada sul mercat francés d'un novèl jornal (papièr) satiric, Bakchich Hebdo, e sul mercat italian d'Il fatto quotidiano (lo coetaire vièlh se deurà téner un pauc mai).
• Òsca a l'avançada de la recèrca per luchar contra lo sida e contra la malautiá de Parkinson.
• Vergonha al lapsús (que n'es benlèu pas un) de Nicolas Sarkozy "prevenguts / copables" al prepaus del procès Clearstream.
• Vergonha a tot aquel monde (Sarkozy, Kouchner, Mitterand, Lang e un fum d'artistas) que demandan l'arrèst dels embestiaments judiciaris americans de Roman Polanski. Perqué el seriá pas persegut e los altres o serián ?
• Vergonha a l'armada de Guinée-Conakry qu'a tirat sul monde que manifestavan contra Moussa Dadis Camara, militari arribat per la fòrça al cap del país e mena de caluc. Mai de 150 mòrts.
• Òsca a Rue89 que vend de T-shirts "Un seul Hortefeux, déjà des problèmes" e "Promis, à 50 ans je n'aurai pas de Rolex".
• Òsca al metrò de Tolosa qu'anoncia las estacions en occitan e vergonha a ieu que fau pas que l'aprene (mercé los Occitans de París !).
• Vergonha a Anne Sinclair (dòna Strauss-Kahn) qu'a dich que se sentissiá melhor en America amb son òme al FMI que non pas a la fèsta de la ròsa a Trifouilly les Oies. Se Kochneriza la Sinclair ?

Aucun commentaire: