28/09/2009

Nimes, la romana espanhòla

Premièira visita a Nimes per ieu e ne soi pas contristada. Al contrari. Ai trobat aquela vila talament romana ! De segur, la cultura taurina ponteja a cada virada de carrièira (musèu, arènas, estatuas, tablèus, comèrcis, libres…). Ai la corridà en orror mès sabe que i a d'altres afars dins aquela cultura taurina. Urosament. Ai longament caminat per la vila e ai aimada la color blau-gris dels contravents, de las fenèstras, del fèrre obrat qu'es gaireben pertot. Aquò's, me sembla, una acordança que balha una mena de serenitat a la vila.
Mès ai pas fach que me passejar pendent aquela dimenjada ! Soi anada a Nimes, çò premièr, per escotar lo collòqui Robèrt Lafònt (1923-2009). L'òme èra un sabent : escriveire, òme politic e scientific. Aquí èra sustot question de l'òme politic e de sa concepcion de las relacions entre las regions de França e París (colonialisme d'endedins). Cal saupre que Robèrt Lafònt es estat lo fissor qu'a menat a la decentralisacion mesa en plaça (malurosament pas a l'auçada de çò que voliá Lafònt) per Mitterrand e Defferre en 1982.  Aquò m'a donada l'enveja de ne saupre mai e vau començar per sa darrièira produccion sul sicut : "Vingt lettres sur l'histoire à ces cons de Français et ces couillons d'Occitans". Tanlèu dintrada, ai passada comanda d'aquel e de "Le coq et l'Oc". 
Las luchas, la de La Sala-Decazeville, la del Larzac, la de Ladrecht son estadas citadas de longa (lo dissabte a ser, avèm vist un film sus Ladrecht e un sus Lafònt). Sovent, me soi creseguda sul Larzac... N'èrem pròches, que lo collòqui èra organizat per "Gardarem la tèrra", associacion montada per Lafònt en 2003, a l'amassada bèla sul Larzac. N'ère.
Evidentament, es estat question tanben de la lenga e de son ensenhament, de las relacions inter-regionalas e inter-nacionalas (Catalonha, Italia) e d'un fum d'altras causas que poiretz trobar lèu sul siti de Gardarem la tèrra

Aucun commentaire: