28/09/2009

Claveta onchuda

Mela a de ranas dins lo frigò, ieu ai de clavetas que tomban del cèl! Vivèm un temps, paure monde ! Ère a trabalhar quand ausiguère quicòm qu'estarissava del costat de la fustada. Coma, sovent, de mirguetas me venon far la nica (venon sustot far la nica a mos dos fenhasses de cats que fan mina de comprene pas e s'estiran davant de se tornar endormir), fasquère pas cas. Pièi, al moment que tornave agachar la fustada end aquò gratava, te vese davalar quicòm d'un pauc negre, me semblèt. Aquò fasquèt "splatch !". Pièi pas res pus. Pas un bruch. Me levère per cercar de qu'èra tombat e te vegère una claveta descoetada dins mon espandigaire de sentors a l'òli* : una claveta descoetada onchuda. N'èra pas plan urosa, la claveta, de mon òli perfumat. Assagère de la butar defòra mès ganhère que, lo temps que li fasiái la caça, me rabalèt d'òli pertot, finiguèt per m'escapar e ara sai pas end es passada la claveta...
[*Vòle dire a Brigitte Bardot, qu'es per ara tornar a la mòda, que l'espandigaire de sentors èra atudat al moment del "splatch". Si que non aviái una claveta descoetada cuècha...]

4 commentaires:

manjacostel a dit…

Malurosa que la calià pas caçar , que devià minjar las aranhas, qu'elas se minjan las moscas.
Pel còp avètz copada la cadena alimentària. E o vos cal far tot a la man ara .
Que lo cat minja lo lusèrpon. Que lo can s'engola lo cat e qu'en China l'òme cosina lo can.
Mas qu'aici minjam las granhòtas`? Curios non?
Savi pas d'ont ven , a las femnas aquela idèa capuda, de caçar de longa lo bestiòlum de l'ostal?
A Mauriça n'i a una mena de clavetas que cantan al plafon , e la nuèch, per dire Oc.... Gingolan ouit, ouit.
A mai que pareissià polida aquela claveta....Damatge !

Joan deu Peiroton a dit…

Pas res a veire mas t'o conti quand meme. Es a prepaus d' una question que pausères coma comentari sul blòg de Jesús Tibau.
Es un tipe que camina tot solet e que rescontra un cople qu'arriba del'autre costat ; un tipe e una femna, la femna es sus un ase.
lo primièr tipe demanda a l'autre:
- te sonas Jausèp?
- òc, li respon lo segond, estonat
- E ta femna, se sona Maria?
- òc, faguèt l'autre, estomagat
- E es prenhada?
- òc (es pas tròp charraire, lo Jausèp)
- e li balharatz lo nom de Jesús?
- A non! aquò plan que non! Pas question que li balhem un nom espanhòl, al nenon!

Patricia a dit…

Mès que, crese ben que i es encara, la claveta onchuda, dins l'ostal...

Patricia a dit…

@J oan deu P
:-)))
Vas plan, tu ?