12/06/2009

Puta de cat !

Dempièi gaireben un mes, tròbave pas un moment per menar lo meun cat-bèl-negre-e-gròs al veterinari. Vesiái ben que patissiá pas mès aviá una aurelha coma una ceba. Duèi, i soi anada. Coma ai un cat-bèl-negre-e-gròs que bolega pas gaire ni de l'ostal ni dins la siá vida, ai pas jamai crompada de gàbia. Mès ara, cossí far ? E ben lo te metère dins l'autò coma aquò. Dins la davalada, s'ajacèt pel sòl, completament aclatat, e fasquèt pas que de miaunar, de tant qu'aviá paur (me cal dire qu'es de 1994 e que l'ai pas fach gaire viatjar). Arribats al veterinari, comence de sortir per anar veire se i aviá pas un rodvailer que trevava dins l'endrech. Res. Me'n tòrne doncas a l'autò per assajar de trapar la bèstia per la pèl del còl e, al moment que l'anave acrancar, rop ! m'escapa... E lo paure el d'anar córrer drech davant el... E ieu darrèr ! Urosament, la carrièira que èrem es tranquila. Bon. De qué far, ara ? El, voliá pas res saupre. Caminava, caminava. Pièi, tot en un còp, sai pas per de qué, se tanquèt, se revirèt, m'agachèt e s'assetèt. Ne cresiái pas mos uèlhs (que m'amaginave ben que lo tornariái pas jamai veire)... Me sarrère d'el, l'alisère e se daissèt trapar. D'aquel temps, la veterinària arribava amb de croquetas per assajar de lo far venir. Quand òm l'agacha, òm vei plan que lo talent es pas la causa que lo tarabusta lo mai... Çaquelà, l'aviá pas vist, ela, lo cat, aviá pas avut lo temps ! Lo menère sus la taula e la filha li netegèt l'aurelha. El, de la calor e de la paur, aviá los coissins dels pès trempes e la lenga que penjava coma la d'un can. Per tornar montar, crompère una gàbia. La veterinària a dich que l'aurelha demorariá benlèu coma una ceba mès aquò fa pas res. Ara, ai un cat-bèl-negre-e-gròs-amb-una-aurelha-coma-una-ceba.

4 commentaires:

manjacostel a dit…

E ben qu'i me cal tornar . Qu'aviai respondut que ièu tanben tenia un cat d'aquela mena ambe una aurèlha plegada , que fasia coco, coma dis la cançon e que tota aquèla responsa s'amaguèt sai pas ont.
Doncas disiai que mon cat euròpenc finiguèt per ne morir de son aurèlha aprèp mantunas operacions, que totjorn tornava aquela saloparia...
Doncas cal se mesfisar, subretot s'es vengut vièlh lo paure... ....
Amistosament.

Patricia a dit…

Bon, me'n vau mefisar dos còps mai, ara...

Mela a dit…

As quicòm contra los rodvailers?!?

:DDD

Patricia a dit…

Non, mès mon cat a pas jamai vist la coeta d'un quite Yorkshire... Voliái pas que me fasquèsse una ataca !