13/06/2009

Las sots de Las Borinas


Aqueste ser, soi anada a una conferéncia sus la bòria de Las Borinas (sus la rota entremièg Laissac e Gabriac) que dependiá, un còp èra, de la domariá d'Aubrac. Coma o podètz veire, tot i es plan servat e la carretariá es pas de creire. I an virat lo film "Fanfan la tulipe" amb Penelope Cruz e Vincent Pérez en 2002, talament qu'aquò's polit. 
Aqueste ser, an presentat l'istoric de la proprietat mès aquela amassada èra sustot lo punt de partença d'una òbra que pròba qu'una mirga pòt soslevar una montanha. 
Quand òm arriba a Las Borinas, a man esquèrra, òm tròba las sots del temps passat que son totas desboseladas. E ben, an decidit de las tornar bastir. Los dorsièrs son estats pesucs a montar mès, de la volontat de un o dos, es nascut un vam que s'arrestarà pas. Aquò comença dissabte e dimenge 13 e 14 de junh : cadun es convidat a venir amb sas manòtas sortir las pèiras, las fustas, lo frami... I a setze sots, ostalets acoconats los uns contra los altres, amb una calada al mièg. 
Se venètz a l'Estivada de Rodés, anatz veire Las Borinas (de Rodés, sègre Severac lo Castèl e sortir a Laissac direccion Espaliu). 

3 commentaires:

manjacostel a dit…

Sai que m'engane , mas aquel castèl aquò's lo que se vei aprèp Cossèrgas , sus la rota de Sant Martin( Sant Giniès , o Sant Saturnin non?)
Las Borinas de tot biais un polid castèl que mòstra plan la riquèsa del païs d'un còp èra.

Patricia a dit…

Non, aquel que parlas es lo de Galinièiras. Galinièiras es atanben una bòria monastica. E Las Borinas son encara mai polidas ! Mès que coneisses plan lo país !

manjacostel a dit…

E de segur , que m'engane , ambe las Galinièras, que las Borinas serian encara mai polidas , mai grandassas, mas que t'aprometi qu'i passarai, que ne soi curios d'o veire . E que se podi ajudar o farai
Mas que ne soi tornat a Tolosa, ara .
E que fasètz un polid trabalh ...
A vos , salud e coratge.