23/03/2009

Sent-Sepulcre


Canton e comuna : Campanhac.

Per la trobar : Dins Campanhac, prenètz lo camin de Sent-Urban (cal passar davant lo cementèri), montatz devas una crotz bèla qu'es sus un truc, aquò vira, contunhatz e anatz passar lo long de bauces. A la cima, trobaretz lo camin de boisses que mònta a la capèla. Es al cap d'aquelses bauces. 

Aquela capèla sembla tanben una jaça. Es bèla, teulada de lausas. Un còp èra, i aviá un pelegrinatge pel 15 d'agòst. La pòrta es plan polida. Tot lo torn, los amoroses an fach de marcas mès, se l'òm agacha plan, l'òm vei de rèssas. N'i a mai d'una. Benlèu qu'a-n-aquela capèla los ressaires de long avián una devocion ? Benlèu pels uèlhs per causa del ressegum ? Benlèu èra per los aparar dins lo viatge long qu'avián a far per anar ressar dins las Pirenèas o en Espanha ? Se qualqu'un o sap...
Quand auretz fach lo torn de la capèla, anatz un pauc pus luènh dins los boisses e veiretz tot lo país : Campanhac, La Ròca-Valzèrgas, Sent-Martin, Sent-Laurenç…
Lo darrièr còp que i ère anada, aviái trobat Elzéard Bouffier, l'òme que plantava d'aures, de Jean Giono : un òme del país que m'aviá contat que se veniá sovent passejar aquí e que… plantava de noguièrs pels esquiròls. Rescontra extraordinària.

3 commentaires:

merike a dit…

Sembla interessant.
No hi ha cap Wikipedia en occità sobre això i no puc trobar el lloc. Només a Jerusalem hi ha une Église du Saint-Sépulcre:-( Bona setmana!

Lo Teulièiròl a dit…

Bon, ai pas léser ara de te daissar un comentari, perque figura-te que soi al trabalh.
Mas tot dins lo teu blòg es fòrça agradiu, e escrives plan, macassiu!
E òsca per la tia fòtò: una fadarèla so glamour…

L'Occitan a París a dit…

Plan mercés per ton ligam sul site l'Occitan a París.

Aviáu pas encara vist ton blòg. Ara aquò i es.

Ai apondut Las Fadarelas sus http://occitan.paris.free.fr/

A+