19/12/2008

Un ostal en Tèrra d'òc

Se cercatz un polit ostal en Tèrra d'òc per vos venir pausar, ai çò que vos cal : http://ostal-occitan.chez-alice.fr

Emma Calvé (1858-1942)


Emma Calvé es nascuda a La Sala (Decazeville - 12) en 1858 e es mòrta a Milhau (12) en 1942.
Emmà a cantat dins totes los operàs del monde. La Callàs davant l'ora. 
Aviái ausit sus Inter, un jorn, que contrarament a las altras divàs, ela èra d'acòrdi per se far enregistrar. Las altras volián pas : la votz èra tròp cambiada pels instruments d'enregistrament de l'epòca e aquò lor fasiá vergonha. Aquò fa qu'avèm, sus de bandas, la votz d'Emmà. Frederic l'Odéon ne passèt un tròç, un jorn, dins son emission de musica classica, "Carrefour de l'Odéon" sus Inter. Emocion...
Un matin de la setmana passada qu'anave al trabalh, escotave Inter e aussise que, a l'Operà Garnièr de París, avián barrada una caissa de plomb n'i a 100 ans amb defença d'i tocar. Calguèt esperar 100 ans davant la tornar dubrir. L'an dubèrta aquesta annada e, dedins, i a d'enregistraments d'Emmà... 
En 1900, crompèt lo castèl de Cabrièiras, al ras de Milhau. Aquí, convidava sos amics (Enric Molin, Calelhon…) del Grelh Roergàs e dançava la borrèia amb elses. Molin o conta dins "En tutant lo grelh" Emmà aimava la lenga e la cultura d'òc. 
Es entarrada al cementèri de Milhau. La soi anada veire. Quand arribère davant sa tomba, un catàs rós i èra jagut, s'i solelhava. I a tanben sus sa tomba un pichon bacin pels aucèls, per que li vengan cantar.

15/12/2008

L'Avairon jost la nèu


Sèm jost 40 cm de nèu. Pòde pas pus ni montar, ni davalar la carrièira de mon vilatge...
Podètz veire sus la fòtò junta que sèm braves... E, encara, avèm lo lum ! Lo vilatge d'a costat a pas cap de lum dempièi dimenge matin. S'an una chiminèia, va plan, se n'an pas an freg ! E los congeladors ! E los qu'an pas que l'induccion per cosinejar !